திரையுலகில் உச்ச நட்சத்திரமாக விளங்கும் விஜய், தனது உழைப்பின் பின்னால் இருக்கும் வலியை எவ்வளவு எளிமையாக வெளிப்படுத்துவார் என்பதற்கு யோகி பாபு பகிர்ந்துள்ள இந்தத் தகவல் ஒரு சான்றாக அமைந்துள்ளது.

ஏ.ஆர். முருகதாஸ் இயக்கத்தில் வெளியான ‘சர்கார்’ படப்பிடிப்பின் போது, ஒரு பாடலுக்கு விஜய்யும் யோகி பாபுவும் இணைந்து நடனமாட வேண்டியிருந்தது. மிகக் கடினமான அந்த நடன அசைவை (Step) ஒரே டேக்கில் விஜய் ஆடி முடித்துள்ளார். அதன் பிறகு யோகி பாபுவின் அருகில் வந்த விஜய், அவரது தோளைப் பிடித்துக்கொண்டு, “என் கால் முட்டியைத் தொட்டுப் பாருடா” என்று கூறியுள்ளார்.

யோகி பாபு தொட்டுப் பார்த்தபோது, விஜய்யின் கால் முட்டிகள் அதிர்வினால் ‘கடகட’ என ஆடிக்கொண்டிருந்ததைக் கண்டு அதிர்ச்சியடைந்துள்ளார். அதற்கு விஜய் மிகவும் எதார்த்தமாக, “மூணு வேளை சோத்துக்கு எவ்வளவு பாடு பட வேண்டியிருக்கு பாரு” என்று கேஷுவலாகச் சொல்லிச் சிரித்துள்ளார்.

கோடிக்கணக்கான ரசிகர்களைக் கொண்ட ஒரு சூப்பர் ஸ்டார், இவ்வளவு பெரிய உயரத்தில் இருந்தும் தனது உழைப்பை மிகவும் சாதாரணமாகவும், நகைச்சுவையுடனும் குறிப்பிட்டது யோகி பாபுவை வியப்பில் ஆழ்த்தியுள்ளது. விஜய்யின் இந்த அர்ப்பணிப்பும், எளிமையும்தான் அவரை இன்று ஒரு மாபெரும் அரசியல் தலைவராகவும் உயர்த்தியுள்ளது என ரசிகர்கள் இந்தத் தகவலைப் பகிர்ந்து கொண்டாடி வருகின்றனர்.