மத்திய பிரதேச மாநிலத்தில் மின்சார வாரியத்தின் அலட்சியத்தால் நடந்ததாகக் கூறப்படும் சோகச் சம்பவம் ஒன்று பெரும் பரபரப்பை ஏற்படுத்தியுள்ளது. குடியிருப்புப் பகுதியில் திறந்தவெளியில் அமைக்கப்பட்டிருந்த டிரான்ஸ்பார்மர் அருகே சென்ற மாடு ஒன்று, எதிர்பாராதவிதமாக மின்சாரம் தாக்கி சம்பவ இடத்திலேயே பரிதாபமாக உயிரிழந்தது.
நீண்ட நாட்களாகவே அந்த டிரான்ஸ்பார்மரைச் சுற்றி பாதுகாப்பு வேலி அமைக்க வேண்டும் என்றும், ஆபத்தான முறையில் உள்ள மின் கம்பிகளைச் சீரமைக்க வேண்டும் என்றும் அப்பகுதி மக்கள் புகார் அளித்து வந்ததாகக் கூறப்படுகிறது. இருப்பினும் அதிகாரிகள் தரப்பில் எந்தவித நடவடிக்கையும் எடுக்கப்படாத நிலையில், தற்போது இந்த சோக சம்பவம் அரங்கேறியுள்ளது.
தங்களின் கண் முன்னேயே மாடு மின்சாரம் தாக்கி துடிதுடித்துப் பலியானதைக் கண்ட ஊர் மக்கள் கடுமையான ஆத்திரமடைந்தனர். அதிகாரிகளின் அலட்சியப் போக்கைக் கண்டித்துத் திரண்ட கிராமத்தினர், மாட்டின் உயிரிழப்புக்குக் காரணமான அந்த டிரான்ஸ்பார்மரை அடித்து நொறுக்கித் தங்களது கோபத்தையும் எதிர்ப்பையும் வெளிப்படுத்தினர்.
இந்தச் சம்பவம் முழுவதையும் அங்கிருந்த சிலர் வீடியோவாகப் பதிவு செய்து இன்ஸ்டாகிராம் உள்ளிட்ட சமூக வலைதளங்களில் வெளியிட்டுள்ளனர். தற்போது இந்த வீடியோ இணையத்தில் மிக வேகமாகப் பரவி வைரலாகி வரும் நிலையில், விலங்குகளின் பாதுகாப்பிலும் மின்சாரப் பராமரிப்பிலும் அலட்சியம் காட்டிய அதிகாரிகள் மீது நடவடிக்கை எடுக்க வேண்டும் என நெட்டிசன்கள் கோரிக்கை விடுத்து வருகின்றனர்.
