அகில இந்திய காங்கிரஸ் தலைவரும், மாநிலங்களவை எதிர்க்கட்சித் தலைவருமான மல்லிகார்ஜுன கார்கே, பாஜக மீது மிகக் கடுமையான தீண்டாமைப் புகாரைச் சுமத்தியுள்ளது தேசிய அரசியல் அரங்கில் பெரும் அதிர்வலைகளை ஏற்படுத்தியுள்ளது. உத்தராகண்ட் மாநிலத்தில் தான் பேசி முடித்த இடத்தைப் பாஜகவினர் சுத்தம் செய்ததாக மாநிலங்களவையில் அவர் பகிரங்கமாகக் குற்றம் சாட்டினார்.
நாடாளுமன்ற மாநிலங்களவை நடவடிக்கைகளின் போது பேசிய மல்லிகார்ஜுன கார்கே, “உத்தராகண்ட்டில் நான் ஒரு பொதுக்கூட்டத்தில் பேசி முடித்ததும், நான் அமர்ந்திருந்த மற்றும் பேசிய இடத்தை பாஜகவைச் சேர்ந்தவர்கள் சுத்தம் செய்துள்ளனர். நான் பட்டியலினத்தைச் சேர்ந்தவன் என்பதாலேயே அவர்கள் இத்தகைய தீண்டாமை நடவடிக்கையில் ஈடுபட்டுள்ளனர்” என்று ஆவேசமாகத் தெரிவித்தார்.
கார்கேவின் இந்த அதிரடிக் குற்றச்சாட்டு அவையில் பெரும் சலசலப்பை ஏற்படுத்திய நிலையில், மத்திய அமைச்சரும் பாஜக தலைவருமான ஜெ.பி.நட்டா இதற்கு உடனடி விளக்கம் அளித்தார். “பாஜக எப்போதும் தீண்டாமையை வன்மையாக எதிர்க்கிறது. இந்தச் சம்பவம் குறித்து நிச்சயமாக உரிய விசாரணை நடத்தப்படும்” என்று அவர் உறுதியளித்தார்.
தொடர்ந்து, இச்சம்பவம் குறித்துக் கருத்துத் தெரிவித்த மாநிலங்களவைத் தலைவர் சி.பி.ராதாகிருஷ்ணன், “தீண்டாமை என்பது ஒரு பாவச் செயல்; அதனை யாராலும் சகித்துக் கொள்ள முடியாது” என்று கூறித் தனது கண்டனத்தைப் பதிவு செய்தார். இந்த விவகாரம் தற்போது தேசிய அளவில் அரசியல் வட்டாரத்தில் பெரும் விவாதப் பொருளாக மாறியுள்ளது.
