தனிப்பட்ட பேரிழப்புகளைச் சந்திக்கும் ஊழியர்களிடம் கார்ப்பரேட் நிறுவனங்கள் எவ்வளவு இரக்கமற்ற முறையில் நடந்துகொள்கின்றன என்பதற்குச் சான்றாக, ‘AntiWork’ என்ற சமூக வலைதளப் பக்கத்தில் பகிரப்பட்ட ஒரு பதிவு இணையவாசிகளை அதிர வைத்துள்ளது.

அந்தப் பதிவைப் பகிர்ந்த ஊழியர், கடந்த இரண்டு மாதங்களுக்கு முன்பு தனது மனைவியை எதிர்பாராத விதமாக இழந்தார். தனது வாழ்க்கைத் துணையின் மரணத்தால் மனரீதியாகச் சிதைந்து போயிருந்த அந்த ஊழியர், சில நாட்கள் பணியிலிருந்து விலகி இருந்துள்ளார். அந்தச் சமயத்தில் அவரது மேலாளர் அவருக்கு ஆதரவாக இருப்பது போலவே பேசியுள்ளார். இதனால், தனது விடுமுறை நாட்களோ அல்லது வேலையோ பாதிக்கப்படாது என்று அந்த ஊழியர் நம்பியுள்ளார்.

துக்கத்திலிருந்து மீண்டு அந்த ஊழியர் மீண்டும் பணிக்குத் திரும்பியபோது, தனது விடுமுறை கணக்கைச் சரிபார்த்தார். அப்போது அவருக்குப் பெரும் அதிர்ச்சி காத்திருந்தது. அவர் விடுப்பில் இருந்த நாட்களை நிறுவனம் ‘ஊதியத்துடன் கூடிய விடுமுறை’ கணக்கில் கழித்துள்ளது. இதனால் அவரது மொத்த விடுமுறை நாட்களும் தீர்ந்து, இப்போது கையில் வெறும் சில மணிநேர விடுப்பு மட்டுமே எஞ்சியுள்ளது.

இது குறித்து தனது மேலாளரிடம் கேட்டபோது, அவர் மிகவும் அலட்சியமாகப் பதிலளித்துள்ளார். நிறுவனத்தின் விதிகளின்படி, நெருங்கிய உறவினர்கள் இறந்தால் ‘மரண கால விடுமுறை’ என்பது அவர்கள் இறந்த நாளிலிருந்து வெறும் சில நாட்கள் மட்டுமே வழங்கப்படும் என்று அவர் கூறியுள்ளார்.

தன்னுடைய வாழ்க்கைத் துணையை இழந்த ஒருவருக்கு, துக்கத்தைக் கடைப்பிடிக்க வெறும் மூன்று நாட்கள் மட்டுமே போதுமானது என்று கார்ப்பரேட் நிறுவனங்கள் கருதுவது எவ்வளவு பெரிய மனிதாபிமானமற்ற செயல் என்று அந்த ஊழியர் வேதனையுடன் பதிவிட்டுள்ளார். “எனது வாழ்க்கையே சிதைந்து கிடக்கும்போது, இந்த விதிகள் குறித்து விவாதிக்கும் மனநிலையில் நான் இல்லை” என்றும் அவர் உருக்கமாகத் தெரிவித்துள்ளார்.

இந்தத் தகவல் வைரலானதைத் தொடர்ந்து, கார்ப்பரேட் நிறுவனங்களின் இத்தகைய இரக்கமற்றப் போக்கிற்கு நெட்டிசன்கள் கடும் கண்டனம் தெரிவித்து வருகின்றனர். “ஊழியர்களை மனிதர்களாகப் பார்க்காமல் இயந்திரங்களாகப் பார்க்கும் இத்தகைய நிறுவன கலாச்சாரம் மாற வேண்டும்” என்று பலரும் கருத்து தெரிவித்து வருகின்றனர்.