இஸ்லாமாபாத்தில் நடைபெறவுள்ள முக்கியப் பேச்சுவார்த்தைக்கு முன்னதாக, இஸ்ரேலுக்கு எதிராக சர்ச்சைக்குரிய கருத்துக்களைத் தெரிவித்த பாகிஸ்தான் பாதுகாப்புத் துறை அமைச்சர் கவாஜா ஆசிப், இஸ்ரேலின் கடும் எதிர்ப்பைத் தொடர்ந்து தனது சமூக வலைதளப் பதிவை நீக்கியுள்ளார். இது பாகிஸ்தானுக்குக் கிடைத்த ஒரு பெரிய ராஜதந்திரப் பின்னடைவாகக் கருதப்படுகிறது.

பாகிஸ்தான் பாதுகாப்புத் துறை அமைச்சர் கவாஜா ஆசிப், தனது எக்ஸ் (X) தளத்தில் இஸ்ரேலை “மனிதகுலத்தின் சாபம்” என்று சாடிப் பதிவிட்டிருந்தார். பாகிஸ்தான் தற்போது அமெரிக்கா மற்றும் ஈரான் நாடுகளுக்கு இடையே அமைதிப் பேச்சுவார்த்தையை முன்னின்று நடத்தும் ஒரு சூழலில், அமைச்சரின் இந்தப் பதிவு பெரும் சர்ச்சையைக் கிளப்பியது. அமைச்சரின் கருத்துக்கு இஸ்ரேல் பிரதமர் பெஞ்சமின் நெதன்யாகுவின் அலுவலகம் கடும் கண்டனம் தெரிவித்தது. இஸ்ரேல் தரப்பில் கூறப்பட்டதாவது, தன்னையொரு ‘நடுநிலைத் தூதராக’ அடையாளப்படுத்திக் கொள்ளும் ஒரு நாட்டின் அமைச்சரிடமிருந்து வரும் இத்தகைய இழிவான மொழியை சகித்துக்கொள்ள முடியாது.

இஸ்ரேலின் ஆக்ரோஷமான எதிர்வினையைத் தொடர்ந்து, பாகிஸ்தான் அமைச்சர் உடனடியாக தனது சர்ச்சைக்குரிய பதிவை நீக்கினார். தற்போதைய பொருளாதார மற்றும் அரசியல் சூழலில், சர்வதேச அழுத்தத்தைத் தாங்கும் நிலையில் பாகிஸ்தான் இல்லை என்பதையே இந்தச் செயல் காட்டுவதாக அரசியல் வல்லுநர்கள் கருதுகின்றனர்.

வல்லுநர்களின் கருத்துப்படி, பிராந்திய அமைதிப் பேச்சுவார்த்தையில் ஒரு பொறுப்பான மற்றும் சமநிலையான நாடாகத் தன்னைக் காட்டிக்கொள்ள பாகிஸ்தான் முயன்று வரும் நிலையில், இந்தச் சம்பவம் அதன் பிம்பத்திற்குப் பெரும் பாதிப்பை ஏற்படுத்தியுள்ளது. ஏதேனும் ஒரு தரப்புக்கு ஆதரவாகச் செயல்படுவது போன்ற தோற்றம் ஏற்படுவதைத் தவிர்க்கவே, பாகிஸ்தான் பணிந்து தனது பதிவை நீக்கியதாகத் தெரிகிறது.