ஈரான் மற்றும் அமெரிக்கா இடையே இரண்டு வார கால போர்நிறுத்த ஒப்பந்தம் எட்டப்பட்ட போதிலும், உலக நாடுகளின் கவலையை அதிகரிக்கும் வகையில் ஹோர்முஸ் ஜலசந்தி (Strait of Hormuz) விவகாரத்தில் ஈரான் புதிய நிபந்தனைகளை விதித்துள்ளது.

சர்வதேச அளவில் கச்சா எண்ணெய் போக்குவரத்தின் உயிர்நாடியாக விளங்கும் இந்த பாதையில், போருக்கு முன்பு நாளொன்றுக்கு சராசரியாக 140 கப்பல்கள் சென்று வந்த நிலையில், இனி தினமும் 15 கப்பல்கள் மட்டுமே அனுமதிக்கப்படும் என ஈரான் அதிரடியாக அறிவித்துள்ளது.

அதுமட்டுமின்றி, ஒவ்வொரு கப்பலும் ஈரானின் புரட்சிகர காவல் படையிடம் (IRGC) முன் அனுமதி பெறுவதுடன், ஒரு பேரல் எண்ணெய்க்கு 1 அமெரிக்க டாலர் வீதம் ‘கிரிப்டோகரன்சி’ மூலம் கட்டணம் செலுத்த வேண்டும் எனவும் ஈரான் நிபந்தனை விதித்துள்ளது.

உலகளாவிய எண்ணெய் விநியோகத்தில் 20 சதவீதத்தைக் கொண்டுள்ள இந்த குறுகிய கடல் பாதையை ஈரான் தனது கட்டுப்பாட்டிற்குள் கொண்டு வந்துள்ளதால், சர்வதேச சந்தையில் பெட்ரோல் மற்றும் டீசல் விலை கடுமையாக உயரும் அபாயம் ஏற்பட்டுள்ளது.

அமெரிக்க அதிபர் டொனால்ட் டிரம்ப், இந்த விவகாரத்தில் நேட்டோ நாடுகளின் தலையீட்டை வலியுறுத்தி வரும் அதே வேளையில், இஸ்ரேல் – லெபனான் மோதலைக் காரணம் காட்டி ஈரான் அவ்வப்போது கப்பல்களைத் தடுத்து நிறுத்துவது இந்த ஒப்பந்தத்தின் நம்பகத்தன்மையைக் கேள்விக்குறியாக்கியுள்ளது.

இந்தியாவின் எரிசக்தித் தேவையில் பெரும் பகுதி இந்தப் பாதையையே சார்ந்துள்ளதால், ஈரானின் இந்த ‘கட்டணம் மற்றும் கட்டுப்பாடு’ கொள்கை இந்தியப் பொருளாதாரத்திலும் நேரடித் தாக்கத்தை ஏற்படுத்தும் என அஞ்சப்படுகிறது.