ராஜஸ்தான் மாநிலம் தௌசா மாவட்டத்தில் கடந்த 2020-ஆம் ஆண்டு மாயமான 4 வயது சிறுவன் பிரின்ஸ் (எ) டில்லு, சொந்தச் சித்தப்பாவால் படுகொலை செய்யப்பட்டு, டெல்லி – மும்பை விரைவுச் சாலை அருகே 30 அடி ஆழத்தில் புதைக்கப்பட்ட அதிர்ச்சித் தகவல் தற்போது வெளிச்சத்திற்கு வந்துள்ளது. சுமார் 5 ஆண்டுகளுக்குப் பிறகு இந்த மர்ம முடிச்சை ராஜஸ்தான் போலீஸார் அவிழ்த்துள்ளனர்.

கடந்த 2016, ஆகஸ்ட் 16-ஆம் தேதி தனது வீட்டின் முற்றத்தில் விளையாடிக்கொண்டிருந்த 4 வயது சிறுவன் பிரின்ஸ் திடீரென மாயமானான். குடும்பத்தினர் பல இடங்களில் தேடியும் எந்தத் துப்பும் கிடைக்கவில்லை. 2021-இல் உயர்நீதிமன்றத்தில் தொடரப்பட்ட ஆட்கொணர்வு மனுவுக்குப் பிறகு, இந்த வழக்கு வேகம் எடுத்தது. சுமார் 7 விசாரணை அதிகாரிகள் மாற்றப்பட்டும், போலீஸார் விடாமுயற்சியுடன் விசாரணையைத் தொடர்ந்தனர்.

சிறுவன் கொலை செய்யப்பட்டு டெல்லி – மும்பை எக்ஸ்பிரஸ்வே அருகே புதைக்கப்பட்டிருப்பதை அறிந்த போலீஸார், உடலை மீட்டெடுக்க டெல்லியிலிருந்து ‘கிரவுண்ட் பெனிட்ரேட்டிங் ரேடார்’ (GPR) என்ற நவீன இயந்திரத்தை வரவழைத்தனர். நிலத்தடி மாற்றங்களைக் கண்டறியும் இந்த இயந்திரம், சுமார் 30 அடி (9 மீட்டர்) ஆழத்தில் சில அறிகுறிகளை காட்டியது. அதன் அடிப்படையில், கடந்த மூன்று நாட்களாக இரண்டு ஜேசிபி இயந்திரங்கள் மூலம் 15 அடிக்கும் மேலாகக் குழி தோண்டப்பட்டு, உடலைத் தேடும் பணி தீவிரமாக நடைபெற்று வருகிறது.

இந்தக் கொடூரக் கொலையில் திடுக்கிடும் உண்மையாக, சிறுவனின் சொந்தச் சித்தப்பா அனில் மற்றும் சித்தி கிருஷ்ணா ஆகியோரே குற்றவாளிகள் என்பது தெரியவந்துள்ளது. குடும்பப் பகை காரணமாகச் சிறுவனைக் கொன்று புதைத்த இவர்கள், சந்தேகம் வராமல் இருக்கக் குடும்பத்தினருடன் சேர்ந்து சிறுவனைத் தேடுவது போல நாடகமாடியுள்ளனர். தற்போது கைது செய்யப்பட்டுள்ள இருவரிடமும் போலீஸார் தீவிர விசாரணை நடத்தி வருகின்றனர்.

துபாயில் பணியாற்றி வந்த சிறுவனின் தந்தை ஜெகமோகன் பைர்வா, தகவல் அறிந்தவுடன் பிப்ரவரி 21-ஆம் தேதி இந்தியா திரும்பினார். “எனது மகனின் சிரிப்பொலி கேட்ட அந்த முற்றம் இன்று காலியாக உள்ளது; நீதித்துறையின் மீது எனக்கு நம்பிக்கை உள்ளது” என அவர் கண்ணீருடன் தெரிவித்தார். மேலும் சிறுவனின் உடலை தேடும் பணிகள் தீவிரமாக நடைபெறும் நிலையில் குற்றவாளிகளிடமும் தீவிர விசாரணை நடைபெறுகிறது.