தமிழக வெற்றிக் கழகத்தின் (TVK) தலைவர் விஜய் அவர்கள், “பிறப்பொக்கும் எல்லா உயிர்க்கும்” என்பதைத் தனது கட்சியின் முக்கியக் கொள்கையாக அறிவித்து வருகிறார். ஆனால், தற்போது சமூக வலைத்தளங்களில் நாம் தமிழர் கட்சியின் ஒருங்கிணைப்பாளர் சீமான் பேசிய காணொளி ஒன்று வைரலாகி வருகிறது. அதில் சீமான், “பிறப்பொக்கும் எல்லா உயிர்க்கும்” என்ற வார்த்தையைத் தனது கட்சி முதலில் எடுத்துக் கொண்ட வேதம் என்று கூறி, அதற்கான ஆதாரமாக நாம் தமிழர் கட்சியின் உறுப்பினர் அட்டையையும் காட்டுகிறார்.


​
​விஜய் அந்தக் கூற்றைக் கொள்கை என்று முன்வைக்க, சீமானோ அதைத் தங்களின் அடிப்படை ‘வேதம்’ (அடிப்படைக் கோட்பாடு) என்று உரிமை கொண்டாடுகிறார். வள்ளுவர் வாக்கை முதலில் பயன்படுத்தியது யார் என்ற விவாதம் ஒருபுறம் இருக்க, “நாம் தமிழர் கட்சியின் ‘வேதத்தை’ விஜய் காப்பி அடித்து தனது கட்சியின் கொள்கையாக அறிவித்து விட்டாரா?” என்ற கேள்வியை எழுப்பி, நாம் தமிழர் ஆதரவாளர்கள் இந்தக் காணொளியைத் தீவிரமாகப் பரப்பி வருகின்றனர். இது சமூக வலைத்தளங்களில் இரு கட்சிகளின் ஆதரவாளர்கள் மத்தியிலும் காரசாரமான விவாதப் பொருளாக மாறியுள்ளது.