தமிழ் திரையுலகின் முன்னணி நடிகரும், உலகநாயகனுமான கமல்ஹாசன், சினிமாத் துறையில் தனது 67 ஆண்டுகாலப் பயணத்தை வெற்றிகரமாக நிறைவு செய்துள்ளார். ‘களத்தூர் கண்ணம்மா’ திரைப்படத்தில் குழந்தை நட்சத்திரமாக அறிமுகமான இவருக்கு, திரைத்துறை பிரபலங்களும் லட்சக்கணக்கான ரசிகர்களும் சமூக வலைதளங்களில் தங்களது மனமார்ந்த வாழ்த்துகளைத் தெரிவித்து வருகின்றனர்.

தமக்கு வாழ்த்து தெரிவித்த அனைவருக்கும் நன்றி தெரிவித்து எக்ஸ் தளத்தில் பதிவிட்டுள்ள கமல்ஹாசன், “எனது 67 ஆண்டுகால சினிமா பயணத்தில், வெறும் 20 ஆண்டுகளை மட்டுமே நான் உண்மையான கற்றலாகக் கருத முடியும். மீதமுள்ள காலம், கழிவுநீர் ஓடும் போக்கிலேயே அடித்துச் செல்லப்பட்டதைப் போன்றதுதான்” என்று மிக உருக்கமாகக் குறிப்பிட்டுள்ளார்.

மேலும், திரைப்படத் துறை தோன்றி சுமார் 130 ஆண்டுகள் ஆகிவிட்ட நிலையில், அதன் வரலாற்றில் பாதியளவுக்கும் மேலாகத் தான் இதில் இயங்கிக் கொண்டிருப்பதை நினைத்துப் பார்க்கவே வியப்பாக உள்ளது என்று தெரிவித்துள்ளார். அத்துடன், சினிமா உலகின் “ஜென்-சி”  தலைமுறையில் நான்தான் மிகவும் மூத்த நபராக இருப்பேன் என்றும் அவர் சுவாரசியமாகப் பகிர்ந்துள்ளார்.

மற்றொருபுறம், கமல்ஹாசனின் ராஜ்கமல் ஃபிலிம்ஸ் இன்டர்நேஷனல் தயாரிப்பில் நடிகர் ரஜினிகாந்த் தனது 173-வது படமான ‘தர்மன்’ படத்தில் நடித்து வருகிறார். அஸ்வத் மாரிமுத்து இயக்கும் இந்தத் திரைப்படத்தைத் தொடர்ந்து, சுமார் 47 ஆண்டுகளுக்குப் பிறகு ரஜினியும் கமலும் இணைந்து புதிய படம் ஒன்றில் நடிக்கவுள்ளனர்.

“>

ரெட் ஜெயண்ட் மூவிஸ் சார்பில் இன்பன் உதயநிதி தயாரிக்கும் இந்தப் புதிய திரைப்படத்தை இயக்குனர் நெல்சன் இயக்கவுள்ளார். அனிருத் இசையமைக்கும் இந்த பிரம்மாண்ட திரைப்படத்திற்கு ராஜீவ் மேனன் ஒளிப்பதிவு செய்கிறார். சினிமா வரலாற்றில் மிக நீண்ட இடைவெளிக்குப் பிறகு சூப்பர் ஸ்டார் ரஜினியும் உலகநாயகன் கமலும் ஒன்றிணைவது ரசிகர்கள் இடையே பெரும் எதிர்பார்ப்பை ஏற்படுத்தியுள்ளது.