தமிழகத்தில் திமுக மற்றும் காங்கிரஸ் கட்சிகளுக்கிடையே கூட்டணி ரீதியாகச் சில கருத்து வேறுபாடுகள் நிலவுவதாகத் தகவல்கள் வெளியான நிலையில், தமிழ்நாடு காங்கிரஸ் கமிட்டித் தலைவர் செல்வப்பெருந்தகை அதற்கு முற்றுப்புள்ளி வைத்துள்ளார். தற்போதைய சூழலில் காங்கிரஸ் கட்சி தொடர்ந்து திமுக கூட்டணியிலேயே நீடிப்பதாக அவர் உறுதிபடத் தெரிவித்துள்ளார். மேலும், கூட்டணி தொடர்பான விவகாரங்களில் மாநிலத் தலைவரான தான் இன்னும் எந்த முடிவையும் அறிவிக்காத நிலையில், கட்சி நிர்வாகிகள் இது குறித்துத் தேவையற்ற கருத்துகளைக் கூற வேண்டாம் என்று அவர் அறிவுறுத்தியுள்ளார்.
மாவட்டச் செயலாளர்கள் அரசியல் விவகாரங்களில் தலையிடாமல் தங்களுக்கு ஒதுக்கப்பட்ட பணிகளில் மட்டும் கவனம் செலுத்த வேண்டும் என அவர் கண்டிப்புடன் தெரிவித்துள்ளார். கூட்டணிக்கு எதிராகச் செயல்படுபவர்கள் அல்லது சர்ச்சைக்குரிய வகையில் பேசுபவர்கள் யாராக இருந்தாலும், அவர்களைக் காங்கிரஸ் மேலிடம் கவனித்துக் கொள்ளும் என்றும் அவர் எச்சரித்துள்ளார். செல்வப்பெருந்தகையின் இந்த அதிரடி விளக்கத்தின் மூலம், திமுக – காங்கிரஸ் கூட்டணியில் நிலவி வந்த புகைச்சல் தற்காலிகமாக முடிவுக்கு வந்துள்ளதாக அரசியல் வட்டாரங்கள் கருதுகின்றன.
