2026 சட்டமன்றத் தேர்தலை முன்னிட்டு, ‘மக்களைக் காப்போம்; தமிழகத்தை மீட்போம்’ என்ற அரசியல் பிரச்சார சுற்றுப்பயணத்தில் அதிமுக பொதுச் செயலாளர் எடப்பாடி பழனிசாமி தீவிரமாக ஈடுபட்டு வருகிறார். நேற்று நன்னிலம், திருவாரூர், கீழ்வேளூர் சட்டமன்ற தொகுதிகளில் பரப்புரை மேற்கொண்ட அவர், நன்னிலத்தில் மாட்டு வண்டியில் பயணம் செய்து அப்பகுதி மக்களிடம் ஆதரவை கோரினார்.

பிரச்சார மேடையில் பேசிய எடப்பாடி பழனிசாமி, “திமுகவிடம் உறுப்பினர்கள் குறைந்து விட்டதால் வீடு வீடாக நடந்து ஓரணிப் பயணம் செய்கிறார்கள். ஆனால், மக்கள் இனி ஏமாறக்கூடாது. திமுக 50 ஆண்டுகளாக காவிரி பிரச்சனையை தீர்க்க முடியவில்லை.

ஆனால் அதிமுக ஆட்சி காலத்தில்தான் காவிரி விவகாரத்தில் வெற்றி பெற்றோம். இன்று திமுக செய்யும் தவறுகளுக்கு கம்யூனிஸ்ட் கட்சிகள் உடந்தையாக இருக்கின்றன. ஏற்கனவே தனித்துவம் கொண்ட கட்சி என்று கருதப்பட்ட கம்யூனிஸ்ட் கட்சி, இப்போது திமுக அரசுக்கு அடிமை சாசனம் எழுதி கொடுத்து விட்டது” என கடுமையாக விமர்சித்தார்.

மேலும் அவர் கூறுகையில், “ஒரு காலத்தில் மக்கள் பிரச்சனையில் முன்னின்று போராடிய கம்யூனிஸ்ட் கட்சி, இன்று திமுகவிடம் பணம் வாங்கிய நாளிலிருந்து மௌனமாகியுள்ளது. மக்கள் மீது இருக்கும் உணர்வைக் கைவிட்டு, சீட் politics-க்கு அடிமையாகி விட்டீர்கள்.

கம்யூனிஸ்ட் கட்சி வரலாறு படைத்த இயக்கம். அதற்காக இப்போது நான் குறை சொல்லவில்லை. ஆனால், மக்களுக்காக செயல்பட்ட கட்சி இன்று தேய்ந்து வருவது வருத்தம் அளிக்கிறது. மக்கள் இதை புரிந்து கொண்டு அதிமுகவை மீண்டும் ஆட்சிக்கு கொண்டு வர வேண்டும்” என கேட்டுக்கொண்டார். இவ்வாறு எடப்பாடி பழனிசாமியின் கடுமையான அரசியல் குற்றச்சாட்டுகள் தற்போது மாநில அரசியலில் கடும் அதிர்வுகளை ஏற்படுத்தியுள்ளன.