தமிழகத்தில் பிளஸ் 2 பொதுத்தேர்வு முடிவுகள் இன்று வெளியாகியுள்ள நிலையில், தந்தை இறந்த சில மணி நேரங்களிலேயே தேர்வு எழுதி, 600-க்கு 582 மதிப்பெண்கள் குவித்து சிவகங்கை மாணவர் ஒருவர் சாதனை படைத்துள்ளார்.

சிவகங்கை நகரைச் சேர்ந்தவர் செந்தில். இவரது மகன் ஹர்ஷித் ராஜலிங்கம், அங்குள்ள தனியார் பள்ளியில் பிளஸ் 2 பயின்று வந்தார். கடந்த மார்ச் மாதம் பொதுத்தேர்வு தொடங்கிய அன்று, தமிழ் மொழிப்பாடம் நடைபெறவிருந்தது. தேர்வு தொடங்குவதற்கு சில மணி நேரங்களுக்கு முன்பாக, மாணவர் ஹர்ஷித்தின் தந்தை செந்தில் திடீர் மாரடைப்பால் காலமானார்.

தந்தையின் மறைவு ஹர்ஷித் குடும்பத்தையே நிலைகுலையச் செய்தது. எனினும், தனது மகனின் கல்வி கனவை நனவாக்க வேண்டும் என்ற தந்தையின் ஆசையை நிறைவேற்ற ஹர்ஷித் உறுதிகொண்டார். தந்தையின் உடலை வீட்டில் வைத்துவிட்டு, கண்ணீரைத் துடைத்துக்கொண்டு தேர்வு மையத்திற்குச் சென்று தேர்வு எழுதினார்.

இன்று வெளியான தேர்வு முடிவுகளில், மாணவர் ஹர்ஷித் ராஜலிங்கம் 600-க்கு 582 மதிப்பெண்கள் பெற்று, பள்ளி அளவில் இரண்டாம் இடத்தைப் பிடித்து அசத்தியுள்ளார். குறிப்பாக, தந்தை இறந்த அன்று அவர் எழுதிய தமிழ் பாடத்தில் 99 மதிப்பெண்கள் பெற்று வியக்க வைத்துள்ளார்.

தந்தை இழந்த பெரும் துயரத்திலும், மனம் தளராமல் கல்வி மீது காட்டிய இந்த அர்ப்பணிப்பு அந்தப் பகுதி மக்களிடையே பெரும் நெகிழ்ச்சியை ஏற்படுத்தியுள்ளது. மாணவர் ஹர்ஷித்தின் இந்தச் சாதனையை ஆசிரியர்களும், சமூக ஆர்வலர்களும் பாராட்டி வருகின்றனர்.