கிரிக்கெட் உலகில் பாகிஸ்தான் அணியின் வீழ்ச்சி என்பது வெறும் களத்தோடு நின்றுவிடுவதில்லை; அதற்குப் பின்னால் அந்நாட்டு கிரிக்கெட் வாரியமான பிசிபி-யின்  சீரழிந்த நிர்வாகமும், மாறக்கூடிய முறைகளையும்தான் சுட்டிக்காட்டுகிறது. இங்கிலாந்து சுற்றுப்பயணத்தில் பாகிஸ்தான் அணி சந்தித்துள்ள பரிதாப நிலை, உலக அளவில் கிரிக்கெட் ரசிகர்களை முகம் சுளிக்க வைத்துள்ளது.

தற்போது இங்கிலாந்து சென்றுள்ள பாகிஸ்தான் கிரிக்கெட் அணி, 3 போட்டிகள் கொண்ட டெஸ்ட் தொடரின் முதல் இரண்டு போட்டிகளிலுமே படுதோல்வியைச் சந்தித்தது. களத்தில் அணியின் செயல்பாடு மோசமாக இருக்க, ஆத்திரமடைந்த கிரிக்கெட் வாரியம் கடைசிப் போட்டிக்குச் செல்வதற்கு முன்பாகவே அணியின் பாதியை கழட்டிவிட்டு அதிரடி காட்டியது.

ஆனால், அதோடு நிற்கவில்லை அவர்களின் கோபம். அணியின் டெஸ்ட் பயிற்சியாளராக இருந்த சர்பராஸ் அகமது அதிரடியாக நீக்கப்பட்டு, அவருக்குப் பதிலாக ஒருநாள் மற்றும் டி20 அணிகளின் பயிற்சியாளரான மைக் ஹெசன் புதிய டெஸ்ட் பயிற்சியாளராக நியமிக்கப்பட்டுள்ளார். இதன் மூலம் கடந்த 3 ஆண்டுகளில் மட்டும் டெஸ்ட் அணியின் பயிற்சியாளர் மாற்றப்படுவது இது 6-வது முறையாகும். அனைத்து வடிவங்களையும் சேர்த்துப் பார்த்தால் கடந்த 5 ஆண்டுகளில் மொத்தம் 11 முறை பயிற்சியாளர்கள் மாற்றப்பட்டுள்ளனர்.

கடந்த 5-6 ஆண்டுகளாகவே டெஸ்ட், ஒருநாள் மற்றும் டி20 என அனைத்து வடிவங்களிலும் பாகிஸ்தான் அணியின் கிரிக்கெட் வரைபடம் அதலபாதாளத்திற்குச் சென்றுள்ளது. குறிப்பாக, சொந்த மண்ணிலும் வெளிநாடுகளிலும் பங்களாதேஷ், ஆஸ்திரேலியா, தென்னாப்பிரிக்கா மற்றும் தற்போது இங்கிலாந்து என்று அடுத்தடுத்து படுதோல்விகளைச் சந்தித்து வருகிறது.

ஆனால், தோல்விக்கான காரணத்தைக் கண்டறிந்து சரிசெய்வதற்குப் பதிலாக, மக்கள் மாதத்திற்கு ஒருமுறை உடை மாற்றுவது போல பிசிபி பயிற்சியாளர்களை மாற்றுவதையே வாடிக்கையாக வைத்துள்ளது. 2023 முதல் இதுவரை நடந்த பயிற்சியாளர் மாற்றங்களின் பட்டியல் இதோ:

க்ராண்ட்  (மார்ச் 2023 – நவம்பர் 2023)

முகமது ஹபீஸ் (நவம்பர் 2023 – பிப்ரவரி 2024)

ஜேசன் கில்லெஸ்பி (ஏப்ரல் 2024 – டிசம்பர் 2024)

அஜார் மஹ்மூத் (ஜனவரி 2025 – டிசம்பர் 2025)

சர்பராஸ் அகமது (ஏப்ரல் 2026 – ஆகஸ்ட் 2026)

மைக் ஹெசன் (செப்டம்பர் 2026 முதல்…)

கடந்த 2021-ஆம் ஆண்டில் நீண்டகாலமாகப் பயிற்சியாளராக இருந்த மிஸ்பா-உல்-ஹக் வெளியேறியதிலிருந்து பாகிஸ்தான் கிரிக்கெட்டின் சீரழிவு தொடர்கிறது. சக்லைன் முஷ்டாக் சிறிது காலம் நீடித்தாலும், அதன் பிறகு வந்த கேரி கர்ஸ்டன், ஆகிப் ஜாவேத் எனப் பலரும் வந்து சென்றார்களே தவிர, அணியை வெற்றிப் பாதைக்கு அழைத்துச் செல்ல முடியவில்லை. முறையான திட்டமிடல் இல்லாத இந்த அவலமான நிர்வாக முறையே பாகிஸ்தான் கிரிக்கெட்டின் இன்றைய நிலைக்கு முக்கிய காரணமாகக் கருதப்படுகிறது.