காசா முனையில் நிலவிவரும் உக்கிரமான போருக்கு முற்றுப்புள்ளி வைக்கும் வகையில், அமெரிக்க அதிபர் டெனால்டு டிரம்ப் 20 அம்சங்களைக் கொண்ட மாபெரும் அமைதித் திட்டத்தை அறிவித்துள்ளார். காசாவில் நீடிக்கும் போரை முடிவுக்குக் கொண்டுவரும் நோக்கில் உருவாக்கப்பட்டுள்ள இந்த வரலாற்றுச் சிறப்புமிக்க ஒப்பந்தத்தின்படி, ஹமாஸ் அமைப்பு தனது ஆயுதங்களைக் கீழே வைக்கவும், காசாவில் இருந்து படைகளைத் திரும்பப் பெறவும் சம்மதம் தெரிவித்துள்ளதாக டிரம்ப் அறிவித்துள்ளார். கடந்த பல ஆண்டுகளாகத் தொடரும் இந்த மோதலில், உலக நாடுகளின் கவனத்தை ஈர்த்துள்ள இந்தத் திடீர் திருப்பம் மத்திய கிழக்கில் ஒரு புதிய அமைதிக்கான எதிர்பார்ப்பை ஏற்படுத்தியுள்ளது.

இந்த அமைதித் திட்டத்தின்படி, ஹமாஸ் அமைப்பு தனது ஆயுதக் கிடங்குகளைக் கைவிடுவதுடன், சுரங்கப் பாதைகளின் வலைப்பின்னலையும் முழுமையாக அழிக்க வேண்டும். இந்த ஆயுதக் களைவுப் பணிகள் நிறைவடைந்தவுடன், இஸ்ரேல் ராணுவம் காசா பகுதியில் இருந்து படிப்படியாகப் பின்வாங்கும். அதனைத் தொடர்ந்து, அங்கு புதிய பாலஸ்தீனக் காவல் படையுடன் இணைந்து பன்னாட்டு நிலைப்படுத்துதல் படை பாதுகாப்புப் பணிகளை ஏற்கும். மேலும், போரால் முற்றிலுமாகச் சிதைந்துள்ள காசா பகுதியை மீட்டுப் புனரமைப்பதுடன், அங்கு ஒரு புதிய தொழில்நுட்ப நிபுணர்கள் அடங்கிய அரசாங்கம் அமைக்கப்படும் என்று இந்தத் திட்டத்தில் விவரிக்கப்பட்டுள்ளது.

ஹமாஸ் தரப்பு இந்த ஒப்பந்தத்திற்குப் பச்சைக்கொடி காட்டியுள்ள போதிலும், இஸ்ரேல் பிரதமர் நெதன்யாகு  மற்றும் அவரது அரசாங்கம் இன்னும் இதற்கு அதிகாரப்பூர்வமாக ஒப்புதல் அளிக்கவில்லை. ஆரம்பக்கட்டமாக இஸ்ரேல் தரப்பில் இருந்து வந்த எதிர்வினைகள், இந்தத் திட்டம் தங்களது முழுமையான கோரிக்கைகளை நிறைவு செய்யவில்லை என்ற தொனியிலேயே உள்ளன. இருப்பினும், இந்த ஒப்பந்தத்தை இஸ்ரேல் முழுமையாக ஏற்று நடைமுறைப்படுத்த வேண்டும் என்றும், இல்லாவிட்டால் தமக்குக் கடும் ஏமாற்றம் ஏற்படும் என்றும் அமெரிக்கா தன் தரப்பிலிருந்து அழுத்தமான எச்சரிக்கையை விடுத்துள்ளது.

கடந்த 2023ஆம் ஆண்டு அக்டோபர் 7ஆம் தேதி தெற்கு இஸ்ரேல் மீது ஹமாஸ் நடத்திய தாக்குதலில் சுமாராக 1,200 பேர் கொல்லப்பட்டு, 251 பேர் பணயக் கைதிகளாகப் பிடிக்கப்பட்டனர். அதற்குப் பதிலடியாக இஸ்ரேல் நடத்திய இடைவிடாத தாக்குதல்களில் காசாவில் 73 ஆயிரத்திற்கும் அதிகமான பாலஸ்தீனர்கள் உயிரிழந்துள்ளனர். இரண்டரை ஆண்டுகளுக்கும் மேலாகத் தொடரும் இந்த கோரத் தாக்குதல்களுக்கு மத்தியில், தற்போது அமெரிக்காவின் மத்தியஸ்தத்தில் உருவாகியுள்ள இந்த புதிய அமைதி ஒப்பந்தம் வெற்றியடைமா அல்லது இஸ்ரேலின் எதிர்ப்பால் முடங்கிப்போகுமா என்ற பெரும் எதிர்பார்ப்பு சர்வதேச அளவில் எழுந்துள்ளது.