தேங்காய்ப் பால் சுவையும் ஊட்டச்சத்தும் நிறைந்த ஒரு இயற்கை பானமாகும். பாலில் உள்ள லாக்டோஸ் அலர்ஜி உள்ளவர்களுக்கும், பால் பொருட்களைத் தவிர்ப்பவர்களுக்கும் சந்தையில் கிடைக்கும் விலை உயர்ந்த பாலுக்கு மாற்றாக வீட்டிலேயே தயாரிக்கப்படும் தேங்காய்ப் பால் சிறந்த தேர்வாகும்.

இதில் உள்ள நல்ல கொழுப்புகள் இதய ஆரோக்கியத்தை மேம்படுத்துவதுடன், உடலுக்குத் தேவையான ஆற்றலையும் தருகின்றன. மேலும், இதில் வைட்டமின்கள் நிறைந்துள்ளதால் சருமத்தை பொலிவாக்கவும், கூந்தலை வலுப்படுத்தவும் உதவுகிறது. இதை அருந்துவது நீண்ட நேரம் வயிறு நிறைந்த உணர்வைத் தருவதால் எடைக் கட்டுப்பாட்டிற்கும் உதவுகிறது.

இதைச் செய்வதற்கு ஒரு புதிய தேங்காய் மற்றும் 2 முதல் 3 கப் வெந்நீர் மட்டுமே போதுமானது. முதலில் தேங்காயின் பழுப்பு நிறத் தோலை நீக்கிவிட்டு, சிறு துண்டுகளாக நறுக்கி அல்லது துருவி எடுத்துக் கொள்ள வேண்டும்.

துருவிய தேங்காயை மிக்ஸியில் போட்டு வெந்நீர் ஊற்றி நன்றாக அரைக்க வேண்டும். பின்னர் சுத்தமான பருத்தித் துணியில் அந்தக் கலவையை ஊற்றிப் பிழிந்தால் கெட்டியான முதல்தர தேங்காய்ப் பால் கிடைக்கும். மீதமுள்ள தேங்காய்ச் சக்கையில் மீண்டும் சுடுநீர் சேர்த்து அரைத்துப் பிழிந்தால் நீர்த்த இரண்டாம் கட்டப் பால் கிடைக்கும்.

இந்தத் தேங்காய்ப் பாலைக் காலை நேர ஸ்மூத்தி, ஓட்ஸ், காபி, தேநீர், சூப்கள் மற்றும் தாய் கறிகளில் கலந்து பயன்படுத்தலாம். இதில் எந்தவித ரசாயனமும் இல்லாததால், காற்றுப் புகாத பாட்டிலில் அடைத்து பிரிட்ஜில் வைத்து 3 முதல் 4 நாட்களுக்குள் பயன்படுத்தலாம்.