சமீபத்தில் சேட்ஜிபிடி தளத்தின் புதிய ஏஐ தொழில்நுட்பத்தைப் பயன்படுத்தி உருவாக்கப்பட்ட யுசிஓ வங்கியின் காசோலை புகைப்படம் இணையத்தில் வைரலாகி பெரும் பரபரப்பை ஏற்படுத்தியுள்ளது. ‘நாங்கள் முடிந்துவிட்டோம்’ என்ற வாசகத்துடன் பகிரப்பட்ட இந்தத் தகவல், செயற்கை நுண்ணறிவு மூலம் நிஜமான காசோலைகளைப் போலவே துல்லியமாகப் போலியானவற்றை உருவாக்க முடியும் என்பதைக் காட்டுகிறது.
இந்த புதிய ஏஐ மாடல்களின் அசுர வளர்ச்சி, வங்கித் துறையில் மிகப்பெரிய மோசடிகளுக்கு வழிவகுக்கும் என்றும், சாதாரண மக்களால் அசல் எது, போலி எது என்பதைக் கண்டறிய முடியாத நிலை ஏற்படும் என்றும் தொழில்நுட்ப வல்லுநர்கள் எச்சரிக்கின்றனர்.
இந்த வைரல் புகைப்படம் நிதி நிறுவனங்கள் மற்றும் வாடிக்கையாளர்கள் மத்தியில் பெரும் அச்சத்தை விதைத்துள்ளது. குறிப்பாக, கையெழுத்துக்கள், வங்கி முத்திரைகள் மற்றும் பாதுகாப்பு குறியீடுகளை ஏஐ மிகத் துல்லியமாகப் பிரதிபலிப்பது பாதுகாப்பு விதிமுறைகளுக்கு விடப்பட்ட சவாலாகப் பார்க்கப்படுகிறது.
மேலும் டிஜிட்டல் யுகத்தில் முன்னேறி வரும் வேளையில், இதுபோன்ற ஏஐ கருவிகள் தவறான நபர்களின் கைகளில் கிடைத்தால் அது நிதிசார்ந்த குற்றங்களுக்கு ஒரு புதிய வாசலைத் திறந்துவிடும் என்பதால், வங்கிகள் தங்களது பாதுகாப்பு கட்டமைப்பை மேலும் வலுப்படுத்த வேண்டிய கட்டாயத்தில் உள்ளன.
