ஆந்திர மாநிலம் கடப்பா மாவட்டம் புரோட்டத்தூர் பகுதியில் அமைந்துள்ள பிரபல டிபன் சென்டரில் வாங்கிய பூரி பார்சலில் பல்லி ஒன்று செத்துக்கிடந்த விவகாரம் அப்பகுதியில் பெரும் கொந்தளிப்பை ஏற்படுத்தியுள்ளது. முஸ்தபா என்ற நபர் வழக்கம் போல் அந்த உணவகத்தில் வாங்கிய பார்சலை வீட்டிற்கு எடுத்துச் சென்று சாப்பிடுவதற்காகத் தட்டில் குர்மாவைப் பரிமாறியபோது, ​​அதில் பெரிய அளவிலான பல்லி ஒன்று கிடந்ததைக் கண்டு கடும் அதிர்ச்சியடைந்தார்.

இந்தத் திடுக்கிடும் காட்சியைக் கண்ட அவர் உடனடியாகக் கோபத்துடன் கடைக்குத் திரும்பிச் சென்று உரிமையாளரிடம் தங்களது முறையற்ற சுகாதாரமற்ற முறை குறித்துக் கேள்வி எழுப்பியுள்ளார்.

ஆனால், வாடிக்கையாளரின் நியாயமான கோபத்தைப் புரிந்து கொள்ளாத ஹோட்டல் உரிமையாளர், எந்தவிதமான குற்ற உணர்ச்சியும் இன்றி மிகவும் அலட்சியமான முறையில் பொறுப்பற்ற பதிலை அளித்துள்ளார். “பல்லியை மட்டும் தனியாக எடுத்துவிட்டு மீதமுள்ள உணவைச் சாப்பிடுங்கள்; குர்மாவில் அது நேரடியாகச் சமைக்கப்படவில்லை என்பதால் எந்தப் பிரச்சினையும் வராது” என்று அவர் திமிராகப் பேசியது பாதிக்கப்பட்ட முஸ்தபாவை மேலும் மன உளைச்சலுக்கு ஆளாக்கியுள்ளது.

உணவகத்தில் வாடிக்கையாளர்களின் உயிரோடு விளையாடும் இத்தகைய மோசமான மனநிலையைக் கண்டு கொதிப்படைந்த அவர், உடனே புரோட்டத்தூர் ஒன் டவுன் காவல் நிலையத்திற்குச் சென்று எழுத்துப்பூர்வமான புகாரைப் பதிவு செய்தார்.

புகாரின் தீவிரத்திகைக் கருத்தில் கொண்டு உடனடியாகச் செயல்பட்ட காவல்துறையினர், சம்பந்தப்பட்ட டிபன் சென்டருக்கு நேரில் சென்று அதிரடி விசாரணை நடத்தியதுடன் அந்த உணவகத்தைப் பூட்டி சீல் வைத்துள்ளனர். உணவகங்கள் மற்றும் விடுதிகளில் இது போன்ற முறைகேடுகள் மற்றும் சுகாதாரக் கேடுகள் தொடர்வதற்கு உணவுப் பாதுகாப்புத் துறை அதிகாரிகளின் முறையான தொடர் ஆய்வுகள் இல்லாததே காரணம் என்று அப்பகுதி மக்கள் கடுமையான எதிர்ப்புகளைத் தெரிவித்து வருகின்றனர்.

இனிவரும் காலங்களில் இதுபோன்ற விபரீதங்கள் நிகழாமல் இருக்க வாரந்தோறும் அல்லது மாதந்தோறும் தீவிரமான சுகாதாரச் சோதனைகளை நடத்த வேண்டும் என்பதே பொதுமக்களின் ஒட்டுமொத்த கோரிக்கையாக உள்ளது.