வெளிநாடுகளில் குடியேறி வாழும் இந்தியர்களைக் குறிவைத்து பல்வேறு நாடுகள் கடுமையான நடவடிக்கைகளை எடுத்துவரும் நிலையில், கனடா நாடு இதில் உச்சத்தைத் தொட்டுள்ளது.

நடப்பாண்டு 2026-ன் முதல் ஆறு மாத காலத்திற்குள் மட்டும் சுமார் 3,323 இந்தியக் குடிமக்களைக் கனடா அரசு அதிரடியாக நாட்டை விட்டு வெளியேற்றியுள்ளது. இந்த எண்ணிக்கை கடந்த காலங்களை ஒப்பிடுகையிலும், அமெரிக்கா உள்ளிட்ட பிற நாடுகள் மேற்கொண்ட நாடுகடத்தல் நடவடிக்கைகளைக் காட்டிலும் கிட்டத்தட்ட மூன்று மடங்கு அதிகமாக இருப்பது பெரும் அதிர்ச்சியை ஏற்படுத்தியுள்ளது.

முறையான ஆவணங்கள் மற்றும் விசா விதிகளை மீறுவோர் மீது கனடா அரசாங்கம் காட்டி வரும் இந்தத் தீவிரமான அணுகுமுறை அங்குள்ள வெளிநாட்டினரிடையே அச்சத்தை உருவாக்கியுள்ளது. நாட்டை விட்டுப் வெளியேற்றப்பட்டவர்களின் பட்டியல் நீண்டு கொண்டே செல்வதுடன், தற்போது கூடுதலாக 7,669 இந்தியர்கள் கனடாவிலிருந்து வெளியேற்றப்படுவதற்கான தற்காலிகப் பட்டியலில் (Removal in Progress) சேர்க்கப்பட்டுள்ளனர். இதன் மூலம் வரவிருக்கும் மாதங்களில் இந்த எண்ணிக்கை மேலும் பல மடங்காக உயரும் என அஞ்சப்படுகிறது.

கல்வி மற்றும் வேலைவாய்ப்பை மையமாகக் கொண்டு கனடாவைத் நாடிச் செல்லும் லட்சக்கணக்கான இந்திய மாணவர்களுக்கும் இளைஞர்களுக்கும் இந்த விவகாரம் பெரும் பின்னடைவாகவும் கவலை அளிப்பதாகவும் மாறியுள்ளது. புலம்பெயர்தல் கொள்கைகளில் கனடா கடுமையான விதிகளைக் கொண்டுவந்துள்ளதால், அங்கு வாழும் இந்தியர்கள் மிகுந்த எச்சரிக்கையுடன் இருக்க வேண்டிய கட்டாயம் ஏற்பட்டுள்ளது.