மத்தியப் பிரதேச மாநிலம் போபாலில், இன்ஸ்டாகிராம் மூலம் பழகிய பெண்ணைக் கொலை செய்து, சடலத்தை இரும்புப் பெட்டியில் அடைத்து செப்டிக் டேங்கிற்குள் வீசிய ஆட்டோ ஓட்டுநர் மற்றும் அவரது குடும்பத்தினர் கைது செய்யப்பட்டுள்ளனர்.

போபால் நிஷத்புரா பகுதியில் உள்ள கமல் நகரில் உள்ள ஒரு செப்டிக் டேங்கிலிருந்து கடந்த சில தினங்களாகக் கடும் துர்நாற்றம் வீசுவதாகப் போலீஸாருக்கு தகவல் கிடைத்தது. சம்பவ இடத்திற்கு விரைந்து வந்த போலீஸார், செப்டிக் டேங்கிற்குள் சோதனை செய்தபோது, அங்கு மறைத்து வைக்கப்பட்டிருந்த ஒரு இரும்புப் பெட்டியைக் கண்டெடுத்தனர். அதனைத் திறந்து பார்த்தபோது, உள்ளே அழுகிய நிலையில் ஒரு பெண்ணின் சடலம் இருப்பதைக் கண்டு அதிர்ச்சியடைந்தனர்.

உயிரிழந்த பெண்ணின் கையில் குத்தப்பட்டிருந்த பச்சை (Tattoo) அடையாளத்தை வைத்து விசாரணை நடத்தியதில், அவர் மகாராஷ்டிர மாநிலத்தை சேர்ந்த அஷ்ரபி என்பது தெரியவந்தது.

போலீஸார் நடத்திய தீவிர விசாரணையில் பின்வரும் திடுக்கிடும் தகவல்கள் வெளியாகியுள்ளன. அதாவது சமூக வலைதளப் பழக்கம் போபாலைச் சேர்ந்த ஆட்டோ ஓட்டுநரான சமீர் கான் என்பவருக்கும், அஷ்ரபிக்கும் ஓராண்டிற்கு முன்பு இன்ஸ்டாகிராம் வழியாகப் பழக்கம் ஏற்பட்டுள்ளது.

கடந்த சில மாதங்களாக இருவரும் போபாலில் ஒன்றாக வசித்து வந்துள்ளனர். ஏற்கனவே திருமணமான சமீரைத் தன்னைத் திருமணம் செய்து கொள்ளுமாறு அஷ்ரபி வற்புறுத்தியதாகவும், இதனால் இருவருக்கும் இடையே அடிக்கடி பண விவகாரத்தில் தகராறு ஏற்பட்டதாகவும் கூறப்படுகிறது.

ஆத்திரமடைந்த சமீர், கடந்த பிப்ரவரி 7-ஆம் தேதி அஷ்ரபியை கழுத்தை நெரித்துக் கொலை செய்துள்ளார். கொலைக்குப் பிறகு சடலத்தை மறைக்கத் தனது குடும்பத்தினரின் உதவியைச் சமீர் நாடியுள்ளார். தனது மனைவி, தாய், சகோதரன் மற்றும் சகோதரி ஆகியோரின் உதவியுடன் சடலத்தை ஒரு இரும்புப் பெட்டிக்குள் திணித்து, வீட்டின் அருகே இருந்த செப்டிக் டேங்கிற்குள் வீசி மறைத்துள்ளார்.

இந்தக் கொடூரச் சம்பவம் தொடர்பாக முக்கியக் குற்றவாளி சமீர் கான் உட்பட நான்கு பேரை போலீஸார் கைது செய்து, தொடர்ந்து விசாரணை நடத்தி வருகின்றனர்.