ஐசிசி டி20 உலகக் கோப்பைத் தொடரின் சூப்பர்-8 சுற்றில், தென்னாப்பிரிக்காவிற்கு எதிரான முக்கியமான ஆட்டத்தில் இந்திய அணி அதிர்ச்சித் தோல்வியடைந்துள்ளது. கடந்த 2024 இறுதிப்போட்டியில் இந்தியாவிடம் இழந்த கோப்பைக்கு, தென்னாப்பிரிக்கா தற்போது பதிலடி கொடுத்துள்ளது.

2023 ஒருநாள் உலகக் கோப்பை இறுதிப் போட்டியில் ஆஸ்திரேலிய கேப்டன் பேட் கம்மின்ஸ் இந்திய ரசிகர்களை அமைதிப்படுத்துவேன் என்று கூறி வெற்றி பெற்றது போல, தற்போது தென்னாப்பிரிக்க வீரர்கள் திட்டமிட்டு இந்தியாவை வீழ்த்தியுள்ளனர். குறிப்பாக, இந்திய அணியின் நட்சத்திர ஆல்-ரவுண்டர் அக்ஷர் படேலை ஆடும் லெவனில் சேர்க்காதது பெரும் விவாதத்தை ஏற்படுத்தியுள்ளது.

பேட்டிங் வரிசையில் இந்தியா செய்த மாற்றங்கள் குறித்து விமர்சனங்கள் எழுந்துள்ளன. 8-வது இடத்தில் களமிறங்கும் ரிங்கு சிங், அந்த இடத்தில் எத்தனை பந்துகளைச் சந்திக்க முடியும்? அல்லது ஆட்டத்தில் எந்த மாதிரியான தாக்கத்தை ஏற்படுத்த முடியும்? என்ற கேள்வி எழுந்துள்ளது. ரிங்கு சிங்கிற்குப் பதிலாக அக்ஷர் படேலைச் சேர்த்திருந்தால், அது பேட்டிங் மற்றும் பந்துவீச்சு என இரண்டிலுமே அணிக்குக் கூடுதல் பலத்தைத் தந்திருக்கும். இது இந்திய அணி செய்த மிகப்பெரிய தவறாகப் பார்க்கப்படுகிறது.

தென்னாப்பிரிக்காவிடம் 76 ரன்கள் வித்தியாசத்தில் தோல்வியடைந்ததால், இந்திய அணியின் நெட் ரன் ரேட் (NRR) -3.800 என்ற பாதாளத்திற்குச் சரிந்துள்ளது. இதனால், அடுத்த இரண்டு போட்டிகளில் வெற்றி பெறுவது மட்டுமே இந்தியாவிற்குப் போதாது; மிகப்பெரிய ரன் வித்தியாசத்தில் வெற்றி பெற்றால் மட்டுமே அரையிறுதிக்கு முன்னேற முடியும் என்ற இக்கட்டான நிலை உருவாகியுள்ளது.

இந்திய அணி தனது அடுத்த சூப்பர்-8 ஆட்டத்தில் வரும் பிப்ரவரி 26-ஆம் தேதி ஜிம்பாப்வே அணியை எதிர்கொள்கிறது. இழந்த ரன் ரேட்டை மீட்டெடுக்கவும், தொடரில் நீடிக்கவும் இந்தியா இந்தப் போட்டியில் அபாரமாக விளையாட வேண்டிய கட்டாயத்தில் உள்ளது.