விஜய் நடித்த ‘ஜன நாயகன்’ திரைப்படம் தணிக்கை விவகாரங்களால் வெளியாவதில் சிக்கல் ஏற்பட்டுள்ளதை காங்கிரஸ் எம்.பி. விஜய் வசந்த் கடுமையாக விமர்சித்துள்ளார்.

தணிக்கை வாரியம் வேண்டுமென்றே மேல்முறையீடு செய்து படத்தின் வெளியீட்டைத் தள்ளிப்போடுவது, பலரின் உழைப்பையும் முதலீட்டையும் பாதிக்கும் என்று அவர் வருத்தம் தெரிவித்துள்ளார்.

ஓடிடி தளங்களின் வருகையால் திரையரங்குகளுக்கு வரும் மக்களின் எண்ணிக்கை ஏற்கனவே குறைந்துள்ள நிலையில், தொடர் விடுமுறை நாட்களில் இது போன்ற தடைகள் ரசிகர்களுக்கும் திரையரங்கு உரிமையாளர்களுக்கும் பெரிய ஏமாற்றத்தையும் நஷ்டத்தையும் தரும் என்று அவர் குறிப்பிட்டுள்ளார்.

இந்த விவகாரத்தின் பின்னணியில் முழுமையான அரசியல் தலையீடு இருப்பதாக விஜய் வசந்த் குற்றம் சாட்டியுள்ளார். விஜய்யின் ‘ஜன நாயகன்’ மற்றும் சிவகார்த்திகேயனின் ‘பராசக்தி’ ஆகிய இரண்டு படங்களுக்கும் தணிக்கைச் சான்றிதழ் வழங்க மத்திய தணிக்கை வாரியம் காட்டி வரும் தாமதம் தற்போது பெரும் சர்ச்சையாக மாறியுள்ளது.

மத்திய அரசின் இந்த அணுகுமுறைக்கு அரசியல் தலைவர்களும் திரையுலகினரும் தொடர்ந்து தங்களது கண்டனங்களைத் தெரிவித்து வருகின்றனர்.