தமிழக அரசியல் வரலாற்றில் முதல்முறையாக தலித் அரசியலை உயர்த்திப் பிடித்து, ஒரு தவிர்க்க முடியாத சக்தியாக வளர்ந்த விடுதலைச் சிறுத்தைகள் கட்சி அமைச்சரவையில் இடம் பெற்றிருப்பது ஒரு புதிய, புரட்சிகரமான பதிவு என்று தொல். திருமாவளவன் தனது பேச்சில் விவரித்துள்ளார். தேர்தல் அரசியல் தொடங்கிய காலம் முதல் காங்கிரஸ், திமுக, அதிமுக அமைச்சரவைகளில் அந்தந்த கட்சிகளைச் சேர்ந்த தலித்துகள் அமைச்சராவது நெடுங்கால மரபுதான் என்று குறிப்பிட்ட அவர், ஆனால் ஒரு தலித் இயக்கமாக விசிக அமைச்சரவையில் அமர்வது இதுவே முதல்முறை என்று பெருமிதம் தெரிவித்தார்.

கேரளா, கர்நாடகா, ஆந்திரா, தெலுங்கானா, மகாராஷ்டிராவில் எல்லாம் எப்போதோ கூட்டணி அமைச்சரவை ஜனநாயகம் மலர்ந்துவிட்டது என்றும், கர்நாடகாவில் தலித்துகளுக்கு அதிகாரம் வாய்ந்த இலாக்காக்களும், ஆந்திரா, தெலுங்கானாவில் துணை முதலமைச்சர் பொறுப்பும் வழங்கப்பட்டுள்ளது என்றும் அவர் சுட்டிக்காட்டினார். ஆனால், பகுத்தறிவு பேசும் தமிழ்நாட்டில் தலித் இயக்கங்களுக்கு அமைச்சரவையில் இடம் கிடைக்கவில்லை என்று குறிப்பிட்ட திருமாவளவன், தற்போது முதல்முறையாகப் பட்டியல் சமூகத்தைச் சேர்ந்த 8 பேர் அமைச்சர்களாகவும், ஒருவர் துணை சபாநாயகராகவும் (மொத்தம் 9 பேர்) இந்தத் தவெக ஆட்சியில் இடம்பெற்றிருக்கிறார்கள் என்று கூறினார்.

இதற்கு எதிராகத் தமிழ்நாட்டில் எந்தக் கழகமும் நிகழவில்லை என்றும், மக்கள் இதனை முழுமையாக ஏற்றுக்கொண்டுள்ளார்கள் என்பதை இன்றைய முதல்வர் விஜய் அரசு உறுதிப்படுத்தியுள்ளது என்றும் அவர் தனது உரையில் மிகத் தெளிவாக எடுத்துரைத்தார்.