மகாராஷ்டிரா மாநிலத்தின் புனே மாவட்டம், கேட் தாலுகாவில் செயல்பட்டு வரும் ஜலிந்தர்நகர் ஜில்லா பரிஷத் பள்ளி, உலகளாவிய கல்வி அமைப்பான T4 Education வழங்கும் ‘உலகின் சிறந்த பள்ளிகள் 2025 – சமூக தாக்கம்’ விருதை வென்று பெருமை சேர்த்துள்ளது.

இந்த விருதிற்காக உலகளவில் பட்டியலிடப்பட்ட 50 முன்னணி பள்ளிகளை பின்னுக்கு தள்ளி, இந்த அரசு மராத்தி நடுத்தர பள்ளி தேர்ந்தெடுக்கப்பட்டுள்ளது. இந்த சாதனை, இந்தியாவில் இருந்து தேர்ந்தெடுக்கப்பட்ட ஒரே அரசு பள்ளியாகும் என்பதாலும் சிறப்பிக்கத்தக்கது.

ஒரு காலத்தில், மாணவர் எண்ணிக்கை குறைவால் மூடப்படவிருந்த இந்த பள்ளி, இன்று சர்வதேச அளவில் அங்கீகாரம் பெற்றிருக்கிறது என்பது ஒரு திறமையான மாற்றத்தின் சான்றாக உள்ளது.
மாநில விதிகளின்படி, 10-க்கும் குறைவான மாணவர்கள் உள்ள பள்ளிகள் மூடப்படும் நிலையில், இரண்டு ஆண்டுகளுக்கு முன்பு இப்பள்ளியில் மாணவர் சேர்க்கை வெறும் 3 பேர் மட்டுமே இருந்தது.

ஆனால், உள்ளூர் கிராம மக்கள், தன்னார்வலர்கள், ஆசிரியர்கள், பெற்றோர்கள் ஆகியோரின் ஒருங்கிணைந்த முயற்சியால், பள்ளி மீண்டு வளர்ச்சியின் பாதையில் சென்றது. தற்போது, 1-ம் வகுப்பு முதல் 7-ம் வகுப்பு வரை 120 மாணவர்கள் கல்வி பயின்று வருகின்றனர்.

இந்த பள்ளியின் வெற்றிக்கு வழிவகுத்த முக்கிய காரணிகளில் ஒன்று, அவர்கள் மேற்கொண்ட ‘மாணவர்கள் – கற்பித்தல் – மாணவர்கள்’ (Student-Teaching-Student) முறை.
இதன் மூலம், மாணவர்கள் ஒருவருக்கொருவர் கற்றுத் தரும் சூழலை உருவாக்கி, முன்னேற்றம், நம்பிக்கை, ஒத்துழைப்பு ஆகியவற்றை ஊக்குவித்துள்ளனர்.

இந்த சாதனையை மகாராஷ்டிரா துணை முதல்வர் அஜித் பவார் பாராட்டியுள்ளார். “ஜலிந்தர்நகர் ஜில்லா பரிஷத் பள்ளி, அதன் சமூக மாற்றத்திற்கான முயற்சியால், மாநிலத்திற்கே பெருமை சேர்த்துள்ளது. இது மற்ற பள்ளிகளுக்கும் ஒரு முன்மாதிரியாக அமைகிறது,” என்று அவர் குறிப்பிட்டார்.

இந்த வெற்றியைப் பற்றி பேசும் பள்ளி முதல்வர் தத்தாத்ரே வேர், “இந்த அங்கீகாரம் ஒரே நபரின் முயற்சியால் கிடைத்ததல்ல. பெற்றோர்கள், ஆசிரியர்கள், கிராம மக்கள், சமூக தன்னார்வலர்கள் என அனைவரின் ஒற்றுமையின் பலனாக இது நிகழ்ந்துள்ளது. மேலும்  எந்த சமூக திட்டமும் வெற்றிபெற, நம்பிக்கையே முக்கியம். அந்த நம்பிக்கையும், நேர்மையான, தன்னலமற்ற உழைப்பிலிருந்தே பிறக்கிறது,” என அவர் உணர்ச்சியோடு தெரிவித்தார்.