தமிழகம் முழுவதும் தமிழக வெற்றி கழகத்தின் (தவெக) பாசறைக் கூட்டங்களை நடத்த அக்கட்சியின் தலைவர் நடிகர் விஜய் முடிவெடுத்திருப்பதாக, தவெகவில் இணைந்திருக்கும் அரசியல் பேச்சாளர் நாஞ்சில் சம்பத் தெரிவித்துள்ளார்.

சென்னையில் இன்று (டிசம்பர் 5) செய்தியாளர்களைச் சந்தித்த அவர், தமிழக அரசியல் களத்தில் இளைஞர்கள் மூலம் அதிரடி மாற்றத்தைக் கொண்டுவருவதற்கான திடமான திட்டத்தை விஜய் கையில் வைத்திருப்பதாகக் கூறினார். “தமிழகத்தின் வரலாற்றிலேயே லட்சக்கணக்கான இளைஞர்களைத் தங்களது மூலதனமாகக் கொண்டுள்ள கட்சி தமிழக வெற்றி கழகம்தான்” என்று அவர் குறிப்பிட்டார்.

இந்த ‘பாசறைக் கூட்டங்கள்’ மூலம், கட்சியில் இருக்கும் இளம் தொண்டர்களை அரசியல் ரீதியாகவும், சமூக ரீதியாகவும் தயார் செய்வதுடன், புதிய இளைஞர்களையும் தவெக பக்கம் ஈர்க்க விஜய் திட்டமிட்டுள்ளார். இதன் மூலம், வருகின்ற தேர்தலை எதிர்கொள்ளும் வகையில் தமிழகத்தின் அனைத்து மாவட்டங்களிலும் கட்சி கட்டமைப்பை வலுப்படுத்துவது தவெக-வின் முக்கிய இலக்காக உள்ளது என அரசியல் நோக்கர்கள் தெரிவிக்கின்றனர். நாஞ்சில் சம்பத்தின் இந்தக் கருத்து, தவெக கட்சி இனி தமிழக அரசியல் களத்தில் இளைஞர் சக்தியைப் பிரதானப்படுத்தி செயல்படும் என்பதற்கான சமிக்ஞையாகக் கருதப்படுகிறது.