கடந்த 2011ஆம் ஆண்டு தேமுதிக 29 சட்டமன்றத் தொகுதிகளில் வென்று மாபெரும் எதிர்க்கட்சியாக உருவெடுத்த நிலையில், அடுத்த இரண்டே ஆண்டுகளில் மறைந்த முன்னாள் முதல்வர் ஜெயலலிதாவால் தேமுதிக சந்தித்த அரசியல் நெருக்கடிகளை எவரும் மறந்திருக்க முடியாது. “அன்று தேமுதிகவுக்கு அதிமுக என்ன துரோகம் செய்ததோ, அதுதான் இன்று கர்மா வடிவில் அப்படியே அவர்களுக்குத் திரும்பி வந்திருக்கிறது” என தேமுதிக பொதுச்செயலாளர் பிரேமலதா விஜயகாந்த் செய்தியாளர்கள் சந்திப்பில் மிகக் காட்டமாக விமர்சித்துள்ளார்.

‘அரசன் அன்று கொல்வான், தெய்வம் நின்று கொல்லும்’ மற்றும் ‘வினை விதைத்தவன் வினை அறுப்பான்’ என்ற பழமொழிகளை சுட்டிக்காட்டிய அவர், அதிமுகவின் தற்போதைய வீழ்ச்சிக்கு அவர்கள் அன்று செய்த துரோகமே காரணம் என்று சாடியுள்ளார். ​அதிமுகவின் தற்போதைய அரசியல் சரிவை ‘கர்மா’ என்று வர்ணித்துள்ள பிரேமலதாவின் இந்த ஓப்பனான பேச்சு தமிழக அரசியல் வட்டாரத்தில் பெரும் புயலைக் கிளப்பியுள்ளது.

தேமுதிகவை முடக்க நினைத்த அதிமுக, இன்று அதே போன்றதொரு இக்கட்டான நிலையைச் சந்தித்து நிற்பது இயற்கையின் நீதி என அவர் சுட்டிக்காட்டியுள்ளார். ஜெயலலிதா ஆட்சிக்காலத்தில் தேமுதிக எதிர்கொண்ட அரசியல் சவால்களையும், தற்போது அதிமுக சந்தித்து வரும் உட்கட்சி பூசல்கள் மற்றும் தொடர் சரிவுகளையும் ஒப்பிட்டு பிரேமலதா பேசியுள்ள இந்த அதிரடிப் பேட்டி, சோஷியல் மீடியாவில் நெட்டிசன்களிடையே மிக வேகமாக வைரலாகி விவாதப் பொருளாக மாறியுள்ளது.