தமிழ் சினிமாவின் முன்னணி நடிகர்களில் ஒருவரான விஜய், கடந்த பிப்ரவரி மாதம் தனது புதிய அரசியல் கட்சி, தமிழக வெற்றிக் கழகத்தை தொடங்கி, தீவிர அரசியலில் களமிறங்க உள்ளார். 2026 சட்டசபை தேர்தலில் போட்டியிட திட்டமிட்டுள்ள விஜய், கைவசமுள்ள படங்களை முடித்துவிட்டு திரைத்துறையில் இருந்து விலகுவதற்கான அறிவிப்பும் வெளியிட்டார். இதற்கிடையில், அவரது 69-வது படத்தின் பணிகள் வேகமாக முன்னேறி வருகின்றன.
தமிழக வெற்றிக் கழகத்தின் முதல் அரசியல் மாநாடு அக்டோபர் 27-ந் தேதி விழுப்புரம் அருகே விக்கிரவாண்டியில் உள்ள வி.சாலை கிராமத்தில் நடைபெற உள்ளதாக அறிவிக்கப்பட்டுள்ளது. இந்த மாநாட்டுக்கான அனுமதி, பல கட்ட ஆலோசனைகளுக்கு பிறகு காவல்துறையால் வழங்கப்பட்டுள்ளது.
மாநாட்டுக்கான ஏற்பாடுகள் குறித்து தற்போது வெளியாகியுள்ள தகவலின்படி, 500-க்கு மேற்பட்ட சிசிடிவி கேமராக்கள் மாநாட்டு பகுதிகளில் அமைக்கப்பட உள்ளன. இதற்கிடையில், வாகனப் பார்க்கிங் வசதிக்காக 4 இடங்கள் தேர்வு செய்யப்பட்டுள்ளது. மேலும், மாநாட்டின் அனைத்து பகுதிகளுக்கும் குடிநீர் வசதி மற்றும் ‘மிஸ்ஸிங் சோன்’ வசதி வழங்கப்பட உள்ளது, இது பொருட்கள் அல்லது நபர்கள் காணாமல் போனால் அவர்களை கண்டுபிடிக்க உதவும்.
மாநாட்டுக்கு 150-க்கும் மேற்பட்ட மருத்துவர்கள் களத்தில் இருப்பார்கள் என்றும், பாதுகாப்பு மற்றும் மருத்துவ குழுக்களுக்கு தனி சீருடை வழங்கப்படும் என அறிவிக்கப்பட்டுள்ளது. கழிவறை மற்றும் மாநாட்டை கண்காணிக்க தனிக் குழு உள்ளிட்ட வசதிகளும் ஏற்பாடு செய்யப்பட்டுள்ளது. 22ஆம் தேதி முதல் 26-ஆம் தேதி வரை திடலில் யாருக்கும் அனுமதி இல்லை; எனினும், 27-ந் தேதி காலை முதல் அனுமதிகள் வழங்கப்பட உள்ளன.
