டெல்லியின் பிரசாந்த் விஹார் பகுதியில் சிபிஐ அதிகாரிகள் போல நடித்து வீட்டில் சோதனை நடத்த முயன்றதாகக் கூறப்படும் கும்பலை போலீஸார் கைது செய்துள்ளனர். இந்த சம்பவத்தில் 7 பேர் கைது செய்யப்பட்டுள்ள நிலையில், அவர்களிடம் இருந்து சிபிஐ சின்னம் கொண்ட உடைகள், போலி அடையாள அட்டைகளின் படங்கள் மற்றும் 8 செல்போன்கள் பறிமுதல் செய்யப்பட்டதாக போலீஸார் தெரிவித்துள்ளனர். கடந்த ஆகஸ்ட் 11-ஆம் தேதி இரவு சுமார் 10 மணியளவில் 8 பேர் கொண்ட குழு புகார்தாரரின் வீட்டுக்கு வந்ததாகக் கூறப்படுகிறது. இதில் 6 ஆண்கள் மற்றும் 2 பெண்கள் இருந்ததாக போலீஸ் விசாரணையில் தெரியவந்துள்ளது. சுமார் ஒன்றரை மணி நேரம் வீட்டுக்கு வெளியே நின்ற அந்தக் குழு, தங்களை சிபிஐ அதிகாரிகள் என அறிமுகப்படுத்தி குடும்பத்தினருக்கு அழுத்தம் கொடுத்ததாகக் கூறப்படுகிறது.

வீட்டில் சோதனை நடத்துவதற்கான உத்தரவு அல்லது உரிய ஆவணங்களை காண்பிக்குமாறு குடும்பத்தினர் கேட்டபோது, அந்தக் குழுவினர் மிரட்டும் வகையில் நடந்துகொண்டதாக போலீஸார் தெரிவித்துள்ளனர். இதற்கிடையில் அக்கம் பக்கத்தினர் அங்கு வந்ததால் நிலைமை மாறியதாகக் கூறப்படுகிறது. பின்னர், புகார்தாரரின் தந்தையின் பெயரில் ஒரு நோட்டீஸ் இருப்பதாகக் கூறிய அந்தக் குழுவினர், அது தங்களது வாகனத்தில் இருப்பதாகவும் எடுத்துவருவதாகவும் கூறிவிட்டு அங்கிருந்து சென்றுள்ளனர். மேலும், புகார்தாரரின் தந்தையின் செல்போனுக்கு சிபிஐ நோட்டீஸ் எனக் கூறப்படும் தகவலும் அனுப்பப்பட்டதாக போலீஸார் தெரிவித்துள்ளனர். பின்னர் அந்த அசல் தகவல் அழிக்கப்பட்ட நிலையில், அதன் திரைப்பிடிப்பு மட்டும் பாதுகாக்கப்பட்டிருந்ததாக விசாரணையில் தெரியவந்துள்ளது.

இந்த சம்பவம் தொடர்பாக ஆகஸ்ட் 19-ஆம் தேதி காவல் நிலையத்தில் வழக்குப் பதிவு செய்யப்பட்டு விசாரணை தொடங்கியது. இதையடுத்து பூஜா அகர்வால், ஆசிஃபா, குல்தீப் சர்மா, சந்தர் பிரகாஷ் சர்மா, சுபம் என்கிற கோலு, ராஜ்வீர் சிங் மற்றும் நிதின் சர்மா ஆகிய 7 பேர் கைது செய்யப்பட்டனர். போலீஸாரின் விசாரணையில் ஒவ்வொருவருக்கும் வெவ்வேறு பங்கு இருந்ததாகக் கூறப்படுகிறது. குறிப்பாக, புகார்தாரர் மற்றும் அவரது வீட்டைப் பற்றிய தகவல்களை சேகரித்ததாகவும், போலி சிபிஐ நடவடிக்கைக்காக ஆட்களை ஒருங்கிணைத்ததாகவும் சிலர் மீது குற்றச்சாட்டு எழுந்துள்ளது. மேலும், சிபிஐ அதிகாரிகள் போல நடிக்க தேவையான உடைகள் மற்றும் போலி அடையாள அட்டைகள் தொடர்பான பொருட்களும் கைப்பற்றப்பட்டதாக போலீஸார் தெரிவித்துள்ளனர்.

கைது செய்யப்பட்டவர்களின் செல்போன்களில் கிடைத்ததாகக் கூறப்படும் பல்வேறு காணொளிகள் மூலம், டெல்லி மட்டுமின்றி மும்பையிலும் இதுபோன்ற போலி சோதனைகள் நடத்தப்பட்டிருக்கலாம் என்ற சந்தேகம் போலீஸாருக்கு ஏற்பட்டுள்ளது. சிபிஐ அதிகாரிகள் மட்டுமின்றி அமலாக்கத்துறை உள்ளிட்ட அரசு விசாரணை அமைப்புகளின் அதிகாரிகள் போலவும் சிலரை குறிவைத்ததாக போலீஸார் கூறுகின்றனர். கடந்த 3 முதல் 4 மாதங்களாக இதுபோன்ற நடவடிக்கைகளில் இந்தக் குழு ஈடுபட்டிருக்கலாம் என ஆரம்பகட்ட விசாரணையில் தெரியவந்துள்ளதாகவும் கூறப்படுகிறது. தற்போது இந்தக் கும்பலால் பாதிக்கப்பட்டிருக்கக்கூடிய மற்ற நபர்களை போலீஸார் அடையாளம் காணும் பணியில் ஈடுபட்டுள்ளனர். போலி ஆவணங்களை தயாரித்தவர்கள் மற்றும் இந்த வலையமைப்பில் தொடர்புடைய மேலும் சிலரை கண்டறியவும் விசாரணை தீவிரப்படுத்தப்பட்டுள்ளது.