முதல் டெஸ்ட் போட்டி சென்னை மற்றும் அதிக டெஸ்ட் ரன் சென்னையில் தான் என எல்ஜிஎம் படத்தின் ஆடியோ மற்றும் டிரைலர் வெளியீட்டு விழாவில் தோனி தெரிவித்துள்ளார். மேலும் தோனி பேசிய கருத்துக்களை பார்ப்போம்..
தோனி என்டர்டெயின்மென்ட் லிமிடெட்டின் முதல் தயாரிப்பு முயற்சியான ‘எல்ஜிஎம்’ அல்லது ‘லெட்ஸ் கெட் மேரீட்’ படத்தின் ஆடியோ மற்றும் டிரைலர் வெளியீட்டு விழா சென்னையில் நடைபெற்றது. தல தோனி மற்றும் படத்தின் கிரியேட்டிவ் தயாரிப்பாளரான அவரது மனைவி சாக்ஷி தோனி ஆகியோர் நிகழ்வில் கலந்து கொண்டனர். தோனி என்டர்டெய்ன்மெண்ட் தயாரிக்கும் ‘Lets Get Married’ திரைப்படத்தின் பாடல்கள் மற்றும் டிரெய்லரை எம்.எஸ் தோனி மற்றும் சாக்ஷி சிங் தோனி வெளியிட்டனர்.
இந்த நிகழ்வில் பேசிய தோனி, சிஎஸ்கேக்கு ஒரு பெரிய விசில் அடிங்க. எனக்கு தமிழில் கெட்ட வார்த்தைகள் தெரியும் என்று என் மனைவி சொன்னார், ஆனால் எனக்கு தமிழில் கெட்ட வார்த்தைகள் தெரியாது என்பதால் நான் அவளுக்கு எந்த தமிழ் கெட்ட வார்த்தைகளையும் கற்பிக்கவில்லை. ஆனால், எனக்கு மற்ற மொழிகளில் தெரியும்.
உங்களில் எத்தனை பேர் இங்கு திருமணம் செய்துள்ளீர்கள்? வீட்டின் முதலாளி யார் என்பது உங்களுக்குத் தெரியும். எனவே ஒரு படத்தைத் தயாரிப்போம் என்று என் மனைவி சொன்னபோது, நான் விளையாட்டாக இருந்தேன். என்னுடைய முதல் டெஸ்ட் அறிமுகம் சென்னையில் தான். என்னுடைய அதிகபட்ச டெஸ்ட் ரன் சென்னையில் தான், இப்போது என்னுடைய முதல் படம் தமிழில். சென்னை எனக்கு இன்னும் சிறப்பு. 2008ல் #ஐபிஎல் தொடங்கிய போது நான் இங்கு தத்தெடுக்கப்பட்டேன். மாநிலத்தின் மீதான எங்கள் பரஸ்பர அன்பின் காரணமாக நாங்கள் எங்கள் முதல் திரைப்படத்தை தமிழில் தயாரித்தோம்.
என்னை நம்புங்கள், #LGM மிக வேகமாக எடுக்கப்பட்ட தமிழ் திரைப்படங்களில் ஒன்றாகும், அதை நாங்கள் சாதனை நேரத்தில் படமாக்கினோம். நான் எல்லோரையும் மகிழ்விக்க விரும்பினேன், நான் எனது குழுவிடம் 2 விஷயங்களைச் சொன்னேன். அனைவருக்கும் நல்ல உணவை வழங்குங்கள், நீங்கள் எதையாவது முடிவு செய்தவுடன், அதற்குச் செல்லுங்கள், இருமுறை யோசிக்க வேண்டாம் என்றேன் என்று கூறினார்.
மேலும் #LGM ஒரு கிளீன் திரைப்படம். நான் என் மகளுடன் கூட இதைப் பார்க்க முடியும், அவளுக்கு நிறைய கேள்விகள் இருந்தாலும், அவள் அதை ரசிப்பாள். ஒரு பையன் தன் அம்மாவிற்கும் காதலிக்கும் இடையே ஏற்படும் பிரச்சனைகளை எப்படி கையாள்கிறார் என்பதை அடிப்படையாக கொண்டு இப்படம் உருவாகியுள்ளது.
இரண்டு ஐபிஎல்களுக்கு இடையே தயாரிப்பு நடந்ததால், #LGM-ன் வேலையில் நான் தலையிடவில்லை. ஆனால் நான் எனது டீமிடம் நிலை குறித்து தொடர்ந்து கேட்டேன்.நான் படத்தை மிகவும் ரசித்தேன். படத்தில் நதியா கண்களால் பேசியுள்ளார். ஹரிஷ்கல்யாண் ஆடியோ வெளியீட்டு விழாவில் நிறைய பேசினார், ஆனால் படத்தில் அவருக்கு குறைவான வரிகள் உள்ளன. 2 பெண்களும் அவரை பேச விடவில்லை என நக்கல் செய்தார்.
யோகி பாபு குறித்தும் தோனி பேசியுள்ளார். நட்சத்திர பேட்ஸ்மேன் அம்பதி ராயுடு ஓய்வு பெற்றுவிட்டதால் அவருக்கு பதிலாக யோகி பாபு சிஎஸ்கே அணியில் இடம்பிடிக்க வாய்ப்பு உள்ளதாக ஆங்கர் பாவனா கேள்வி எழுப்பியுள்ளார்.. அப்போது தோனி ” ராயுடு ஓய்வு பெற்றவர். CSK இல் எங்களுக்கு ஒரு இடம் உள்ளது. யோகி பாபுவுக்கு கிரிக்கெட்டில் ஆர்வம் உள்ளது என்பது எனக்கு நன்றாகத் தெரியும், அவரை அணியில் சேர்க்க சிஎஸ்கே நிர்வாகத்திடம் பேச்சுவார்த்தை நடத்த முடியும். ஆனால் ஒரு நிபந்தனையின் பேரில் யோகி பாபு முறையான கால்ஷீட் கொடுக்க வேண்டும். மேட்ச் விளையாடும் நேரம் மற்றும் பயிற்சிக்கு தவறாமல் வரவும், அவர் சம்மதித்தால், நிர்வாகத்திடம் பேச தயாராக இருக்கிறேன் என்றார்.
மேலும் “அதே நேரத்தில், பந்து வீச்சாளர்கள் ஸ்டம்பை நோக்கி பந்து வீச மாட்டார்கள், பேட்ஸ்மேனை நோக்கி பந்து வீசுவார்கள், அவர்கள் மிக வேகமாக பந்து வீசுகிறார்கள். அவர்கள் உங்களை காயப்படுத்த மட்டுமே பந்து வீசுகிறார்கள். அதை கையாளும் திறன் அவருக்கு இருக்கிறதா என்பதை யோகி பாபு முடிவு செய்யட்டும்” என்று நகைச்சுவையாக கூறினார்.
சென்னை வேகப்பந்து வீச்சாளர் தீபக் சாஹர் குறித்து பேசிய தோனி, “தீபக் சாஹர் ஒரு போதை (ஒயின்) போன்றவர், அவர் இல்லை என்றால், அவர் எங்கே என்று நீங்கள் நினைப்பீர்கள். அவர் அருகில் இருந்தால், அவர் ஏன் இங்கே இருக்கிறார் என்று நீங்கள் நினைக்கலாம். நல்லது என்னவென்றால், அவர் முதிர்ச்சியடைகிறார், ஆனால் முழுமையாக முதிர்ச்சியடைய அவருக்கு நேரம் தேவைப்படுகிறது. அவர் 50 வயதில் தான் முதிர்ச்சியடைவார் மற்றும் ஜிவா இப்போது 8 வயதில் எப்படி இருக்கிறாரோ அவ்வளவு புத்திசாலியாக அப்போது இருப்பார். பிரச்சனை, என் வாழ்நாளில், அவர் முதிர்ச்சியடைந்ததை நான் பார்க்க மாட்டேன்,அது சந்தேகம் தான் (சிரிக்கிறார்),”என்று சிஎஸ்கே கேப்டன் கூறினார்.
எல்ஜிஎம் படத்தை ரமேஷ் தமிழ்மணி இயக்க, ஹரிஷ் கல்யாண், இவானா, நதியா, யோகி பாபு போன்ற பல பிரபலங்கள் முக்கிய வேடத்தில் நடித்துள்ளனர். இந்த ஜூலை மாதம் படம் திரையரங்குகளில் வெளியாகும் எனவும் தெரிவிக்கப்பட்டுள்ளது.
