அமெரிக்க நீதித்துறை வெளியிட்டுள்ள ஜெஃப்ரி எப்ஸ்டீன் தொடர்பான லட்சக்கணக்கான ஆவணங்கள் மற்றும் வீடியோக்கள் சர்வதேச அளவில் பெரும் அரசியல் அதிர்வலைகளை ஏற்படுத்தியுள்ளன. இந்த ஆவணங்களில் பல்வேறு நாட்டுத் தலைவர்கள் மற்றும் பிரபலங்களின் பெயர்கள் இடம்பெற்றுள்ள நிலையில், குறிப்பாகப் பிரிட்டன் அரசியலில் இது பெரும் புயலைக் கிளப்பியுள்ளது.

பிரிட்டனின் முன்னாள் தூதர் பீட்டர் மண்டேல்சன், எப்ஸ்டீனுடன் நெருங்கிய தொடர்பு கொண்டிருந்தது புதிய புகைப்படங்கள் மற்றும் மின்னஞ்சல்கள் மூலம் உறுதியாகியுள்ளது. இதன் விளைவாக, மண்டேல்சனைத் தூதர் பதவியிலிருந்து நீக்கியதுடன், அவரைத் தகுதி நீக்கம் செய்யவும் பிரிட்டன் அரசு நடவடிக்கை எடுத்துள்ளது.

இந்த விவகாரத்தில் பீட்டர் மண்டேல்சனின் பொய்களை நம்பி அவருக்குப் பதவி வழங்கியதற்காகப் பிரிட்டன் பிரதமர் கெய்ர் ஸ்டார்மர் பகிரங்கமாக மன்னிப்பு கோரியுள்ளார். எப்ஸ்டீனால் பாதிக்கப்பட்டவர்களிடம் மன்னிப்பு கேட்ட அவர், மண்டேல்சன் தம்மிடம் உண்மையை மறைத்து ஏமாற்றிவிட்டதாகத் தெரிவித்தார்.

இதற்கிடையே, இந்தியப் பிரதமர் நரேந்திர மோடியின் பெயர் இந்த ஆவணங்களில் இடம்பெற்றுள்ளதாக எழுந்துள்ள புகார்களை இந்திய வெளியுறவுத்துறை அமைச்சகம் வன்மையாக மறுத்துள்ளது. இது ஒரு குற்றவாளியின் அர்த்தமற்ற குறிப்புகள் என்றும், இதனை முற்றிலும் புறக்கணிக்க வேண்டும் என்றும் இந்தியா தெளிவுபடுத்தியுள்ளது.

டொனால்ட் டிரம்ப், பில் கேட்ஸ் உள்ளிட்ட பலரும் இந்த ஆவணங்கள் தொடர்பாகப் பல்வேறு விளக்கங்களை அளித்து வருகின்றனர்.