அமெரிக்கா மற்றும் இஸ்ரேல் நாடுகளுடன் நிலவி வரும் மோதல் போக்கு காரணமாக ஈரான் நாட்டில் தற்போது மிகுந்த அச்சமும் பதற்றமும் நிலவி வருகிறது. அமெரிக்க அதிபர் டொனால்ட் டிரம்ப் விதித்த காலக்கெடு முடிவடைய உள்ள நிலையில் இஸ்ரேல் பாதுகாப்புப் படை ஈரான் மக்களுக்கு ஒரு பகீர் எச்சரிக்கையை விடுத்துள்ளது.

ஈரான் நேரப்படி இன்று இரவு 9 மணி வரை பொதுமக்கள் யாரும் இரயில் நிலையங்கள் மற்றும் இரயில் தண்டவாளங்கள் அருகில் செல்ல வேண்டாம் என்றும் மீறினால் உயிருக்கு ஆபத்து ஏற்படக்கூடும் என்றும் இஸ்ரேல் தெரிவித்துள்ளது. இதன் காரணமாக ஈரானின் போக்குவரத்து கட்டமைப்புகள் மீது இஸ்ரேல் மிகப்பெரிய தாக்குதலை நடத்தக்கூடும் என்று எதிர்பார்க்கப்படுகிறது.

அதே வேளையில் அமெரிக்காவின் தாக்குதலை எதிர்கொள்ள ஈரான் அரசு ஒரு வினோதமான உத்தியைக் கையாண்டுள்ளது. அந்நாட்டின் மின் உற்பத்தி நிலையங்கள் மற்றும் முக்கிய எரிசக்தி மையங்களைச் சுற்றி இளைஞர்கள் மற்றும் மாணவர்கள் மனிதச் சங்கிலி அமைத்து ஒரு பாதுகாப்பு வளையத்தை உருவாக்க வேண்டும் என்று ஈரான் அரசு அழைப்பு விடுத்துள்ளது.

ஹார்முஸ் ஜலசந்தியை மீண்டும் திறக்க வேண்டும் என்ற டிரம்பின் நிபந்தனையை ஈரான் ஏற்காவிட்டால் அந்நாட்டின் உட்கட்டமைப்புகள் மீது கடுமையான குண்டுவீச்சு நடத்தப்படும் என்று அமெரிக்கா மிரட்டல் விடுத்துள்ளது.

இந்த இக்கட்டான சூழலில் போரைத் தடுப்பதற்கான தூதரக அளவிலான பேச்சுவார்த்தைகள் மிகவும் முக்கியமான மற்றும் இறுதிக்கட்டத்தை எட்டியுள்ளதாகப் பாகிஸ்தானுக்கான ஈரான் தூதர் ரசா அமிரி மொகத்தம் தெரிவித்துள்ளார். அமைதியை நிலைநாட்டப் பாகிஸ்தான் மேற்கொண்டு வரும் முயற்சிகள் பயனுள்ளதாக இருப்பதாகவும் அவர் குறிப்பிட்டுள்ளார்.

ஏற்கனவே அமெரிக்காவின் ராணுவத் தளங்கள் மீது ஈரான் நடத்திய பதில் தாக்குதலால் மத்திய கிழக்கில் போர் மேகங்கள் சூழ்ந்துள்ள நிலையில் இந்தப் பேச்சுவார்த்தைகள் தோல்வியடைந்தால் அந்தப் பிராந்தியம் முழுவதும் மிகப்பெரிய போரைச் சந்திக்க நேரிடும் என்று சர்வதேச அரசியல் வல்லுநர்கள் கவலை தெரிவித்துள்ளனர்.