தமிழ்நாடு மாநில வாணிபக் கழகம் டாஸ்மாக் கடைகளில் தொகுப்பூதியத்தில் பணிபுரியும் 25 ஆயிரத்திற்கும் மேற்பட்ட ஊழியர்களின் முக்கிய கோரிக்கைகளை டாஸ்மாக் நிர்வாகம் திட்டவட்டமாக நிராகரித்துள்ளது. தமிழகம் முழுவதும் உள்ள 4,787 டாஸ்மாக் மதுபானக் கடைகளில் பணிபுரியும் ஊழியர்கள், தங்களைப் பணி நிரந்தரம் செய்ய வேண்டும், காலமுறை ஊதியம் வழங்க வேண்டும் மற்றும் ஓய்வூதியம் உள்ளிட்ட நலத் திட்டங்களை வழங்க வேண்டும் என நீண்டகாலமாகக் கோரிக்கை வைத்து வருகின்றனர். இந்தக் கோரிக்கைகள் அனைத்தும் அரசின் கொள்கை முடிவுக்கு உட்பட்டவை என்றும், அதில் தலையிட முடியாது என்றும் டாஸ்மாக் நிறுவனம் அறிவித்துள்ளது.

டாஸ்மாக் நிர்வாகத்தின் இந்த நிராகரிப்பால் அதிருப்தி அடைந்துள்ள ஊழியர்கள், தங்களது கோரிக்கைகளை வலியுறுத்திப் போராட்டத்தில் குதிக்க முடிவு செய்துள்ளனர். அதன்படி, வரும் 16-ஆம் தேதி, சென்னை தலைமைச் செயலகம் முன்பு மாபெரும் போராட்டத்தில் ஈடுபடப் போவதாக அவர்கள் அறிவித்துள்ளனர். தொகுப்பூதியத்தை உயர்த்தி வழங்குவது, பணி நிரந்தரம் செய்வது ஆகியவை அரசின் நேரடிக் கட்டுப்பாட்டில் உள்ள நிலையில், அரசின் கவனத்தை ஈர்க்கும் விதமாக இந்தப் போராட்டம் அமைய உள்ளதாகத் தெரிவிக்கப்பட்டுள்ளது. இந்த விவகாரம் தமிழக அரசியல் வட்டாரத்தில் தற்போது பேசுபொருளாகியுள்ளது.