தமிழ்நாடு சட்டப்பேரவையில் நீதி, சிறை, சட்டம், எரிசக்தி மற்றும் அறநிலையத் துறைகளின் மானியக் கோரிக்கை மீதிகள் குறித்த விவாதங்கள் தீவிரமாக நடைபெற்று வருகின்றன. இக்கூட்டத்தில் தவெக ஆட்சிக்குப் பிறகு வீடுகளில் மின்கட்டணம் திடீரெனக் கணிசமாக உயர்வதற்கான காரணம் என்ன என்ற கேள்வி எழுப்பப்பட்டது. மேலும், மின் கட்டண உயர்வு தொடர்பாக அமைச்சரும் நிர்வாகமும் முரண்பாடான தகவல்களைத் தெரிவிப்பதாக முன்னாள் அமைச்சர் செந்தில்பாலாஜி குற்றம்சாட்டினார்.

இதற்குப் பதிலளித்துப் பேசிய மின் துறை அமைச்சர் நிர்மல்குமார், மின்வாரியம் தானாக முன்வந்து 3 லட்சத்திற்கும் அதிகமான இணைப்புகளை மறுஆய்வு செய்தபோது, 2,719 இணைப்புகளில் முரண்பாடுகள்  கண்டறியப்பட்டதாகத் தெரிவித்தார். நேரடி ரீடிங் எடுக்காமல் முந்தைய மாதக் கணக்கைக் கொண்டு ‘டேபிள் ரீடிங்’ முறையைப் பின்பற்றியதாலேயே இந்தத் தவறுகள் நேர்ந்ததாகவும், இனிமேல் வீடுகளுக்கு நேரடியாகச் சென்று ரீடிங் எடுக்க வேண்டும் என அறிவுறுத்தப்பட்டுள்ளதாகவும் அவர் விளக்கம் அளித்தார்.

தொடர்ந்து பேசிய அமைச்சர், செய்தியாளர் சந்திப்பில் தான் தடித்த வார்த்தைகளைப் பயன்படுத்துவதாக செந்தில்பாலாஜி குறிப்பிடுவதைச் சுட்டிக்காட்டினார். கடந்த ஆட்சிக்காலத்தில் மின்துறையில் நடந்ததாகக் கூறப்படும் முறைகேடுகள் மற்றும் டெண்டர் விவகாரங்கள் குறித்தும் அவர் கடுமையான விமர்சனங்களை முன்வைத்தார். மேலும், கடந்த ஆட்சியில் ஒரே துறையில் அடுத்தடுத்து 4 அமைச்சர்கள் மாற்றப்பட்டதையும் அவர் சுட்டிக்காட்டினார்.

இதற்கிடையே, மின்வாரியக் கொள்ளை விளக்கக் குறிப்பில் வெறும் 5 பக்கங்களில் மட்டுமே தரவுகள் இருப்பதாகவும், மீதமுள்ள பகுதிகள் பழைய புள்ளிவிவரங்கள் இல்லாத குறிப்புகள்தாம் என்றும் செந்தில்பாலாஜி வாதிட்டார். குறிப்பாக, 3,437 கேங்மேன்கள் பணியிட மாற்றம் செய்யப்பட்டதாகக் குறிப்பிடப்பட்டிருந்தாலும், உண்மையில் இதுவரை யாரும் விடுவிக்கப்படவில்லை என்றும் அவர் சட்டப்பேரவையில் தனது வாதங்களை முன்வைத்தார்.