தமிழக அரசியலில் புதிய திருப்பத்தை ஏற்படுத்தும் வகையில், தவெக கட்சியில் முக்கிய தலைவர்கள் இணைய உள்ளதாக தகவல்கள் வெளியாகியுள்ளன. வரும் மாதம் நடைபெற உள்ள தவெகவின் முதல் மாநாட்டில், திராவிடக் கட்சிகளான திமுக மற்றும் அதிமுக-வில் இருந்து அதிருப்தியில் உள்ள முன்னாள் அமைச்சர்கள் மற்றும் மூத்த தலைவர்கள் இணைவதற்கான ஏற்பாடுகள் நடைபெற்று வருவதாக கூறப்படுகிறது.
குறிப்பாக, திமுகவில் டெல்டா மாவட்டத்தைச் சேர்ந்த முன்னாள் மத்திய அமைச்சரும், அதிமுகவில் திருச்சி மற்றும் மதுரை மாவட்டங்களைச் சேர்ந்த முன்னாள் அமைச்சர்களும் தவெகவில் இணைவதற்கு தயாராக உள்ளதாக தகவல்கள் வெளியாகியுள்ளன. தற்போதுள்ள கட்சிகளில் தங்களுக்கு போதிய வாய்ப்பு கிடைக்காததால், இந்த முன்னாள் அமைச்சர்கள் புதிய கட்சியில் தங்களது அரசியல் வாழ்க்கையை தொடர முடிவு செய்துள்ளதாக கூறப்படுகிறது.
இந்நிலையில், தவெக கட்சியில் இணைய உள்ள முன்னாள் அமைச்சர்கள் மற்றும் தலைவர்கள், கட்சியின் வளர்ச்சிக்காக தங்களது அனுபவங்களையும், ஆதரவாளர்களையும் தந்து உதவுவார்கள் என எதிர்பார்க்கப்படுகிறது. இதன் மூலம் தவெக கட்சி, தமிழக அரசியலில் ஒரு முக்கிய அங்கமாக மாறும் என்றும், வரும் சட்டமன்ற தேர்தலில் தாக்கத்தை ஏற்படுத்தும் என்றும் அரசியல் பிரமுகர்கள் கருத்து தெரிவிக்கின்றனர்.
