மகாராஷ்டிர மாநிலம் புனே நகரில் சிறுமி ஒருவருக்கு நேர்ந்த கொடுமை தொடர்பாகப் போலிசார் மேற்கொண்ட விசாரணை, திரில்லர் திரைப்படங்களையே மிஞ்சும் வகையில் அமைந்திருப்பதுடன் ஒட்டுமொத்தப் பகுதியையும் அதிர்ச்சியிலும் அருவருப்பிலும் ஆழ்த்தியுள்ளது.

மேலும் அஞ்சாநெஞ்சத்துடன் குற்றங்களைச் செய்துவிட்டுச் சமூகத்தில் நடமாடும் குற்றவாளிகள், தங்களின் சொந்தத் தவறுகளாலேயே எவ்வாறு போலிஸாரின் வலையில் மிக எளிதாகச் சிக்கிக் கொள்கிறார்கள் என்பதற்கு இந்தச் சம்பவம் ஒரு கசப்பான சான்றாக மாறியுள்ளது. பிஞ்சுச் சிறுமியிடம் அத்துமீறி நடந்துகொண்ட கொடூரனைத் தேடி வந்த போலிசாருக்கு, அவனது அலட்சியமும் துணிச்சலுமே அவனுக்கான விலங்கை மாற்ற உதவியுள்ளது.

வழக்கின் பின்னணியை ஆராய்ந்த போலிசார், குற்றவாளியைக் கண்டறியச் சம்பவ இடத்தைச் சுற்றியிருந்த சிசிடிவி கேமரா காட்சிகளை தீவிரமாக ஆய்வு செய்து வந்தனர். அப்போது, ஒரு குறிப்பிட்ட நபர் சந்தேகத்திற்கு இடமான வகையில் சைக்கிளில் வேகமாகச் செல்வது கண்டறியப்பட்டது.

சந்தேக நபரின் முகமும் அடையாளமும் தெளிவாகத் தெரியாத நிலையில், அப்பகுதியில் இருந்த சந்தேகத்திற்குரிய நபர்களைப் போலிஸ் நிலையத்திற்கு வரவழைத்து விசாரணை நடத்தினர். அதில் ஒரு நபரிடம் அந்தச் சிசிடிவி காட்சிகளைக் காட்டி, “சைக்கிளில் போவது யார் என்று தெரியுமா?” எனக் கேட்க, அந்த நபர் சற்றும் யோசிக்காமல் “சார், இது நான் தான்!” என்று கூறித் தன் சொந்த வாயாலேயே உண்மையை ஒப்புக் கொண்டுள்ளான்.

மேலும் தான் மாட்டிக்கொள்வோம் என்ற பயமே இல்லாமல், தான் செய்த கொடூரச் செயலின் தீவிரம் புரியாமல் அவன் கூறிய பதில், விசாரணையில் இருந்த போலிசாரையே சில நிமிடங்கள் உரைய வைத்துள்ளது. உடனடியாக அந்த நபரை கைது செய்த போலிசார், அவர் மீது சிறுமிகளுக்கு எதிரான பாலியல் குற்றத் தடுப்புச் சட்டத்தின்கீழ் வழக்குப்பதிவு செய்து சிறையில் அடைத்துள்ளனர்.

பிஞ்சு வாழ்க்கையைச் சீரழிக்கத் துணிந்த இத்தகைய மிருகத்தனமான நபர்களுக்கு நீதிமன்றம் மூலம் அதிகபட்ச தண்டனை பெற்றுத்தர வேண்டும் என்றும், குழந்தைகள் பாதுகாப்பு விஷயத்தில் பெற்றோர்கள் கூடுதல் கவனத்துடன் இருக்க வேண்டும் என்றும் சமூக ஆர்வலர்கள் வலியுறுத்தி வருகின்றனர்.