ஒடிசா மாநிலம் கேந்திரபடா மாவட்டத்தில் தொடர்ந்து பெய்து வரும் கனமழைக்கு நடுவே தேசிய நெடுஞ்சாலையின் ஒரு பகுதி திடீரென உள்வாங்கியது. பாரதீப்-சண்டிகோல் இடையேயான தேசிய நெடுஞ்சாலை-53-ல் இந்த சம்பவம் நடைபெற்றது. புதிதாக அமைக்கப்பட்ட சாலையின் ஒரு பகுதி திடீரென கீழே இறங்கியதால், அந்த வழியாகச் சென்ற 3 லாரிகள் கட்டுப்பாட்டை இழந்து சாலையோர பள்ளத்தில் கவிழ்ந்தன. அப்போது அந்தப் பகுதியில் சாலை அமைக்கும் பணிகளும் நடைபெற்று வந்ததாகக் கூறப்படுகிறது.

தொடர்ந்து பெய்த கனமழையால் சாலையின் கீழ்பகுதி மண் பாதிக்கப்பட்ட நிலையில், புதிதாக அமைக்கப்பட்ட சாலை திடீரென உள்வாங்கியதாகத் தெரிவிக்கப்பட்டுள்ளது. சாலை கீழே இறங்கியதைத் தொடர்ந்து அங்கு சென்றுகொண்டிருந்த லாரிகள் அடுத்தடுத்து சாலையோரமாக கவிழ்ந்தன. இதனால் அந்தப் பகுதியில் பரபரப்பு ஏற்பட்டது. இந்த சம்பவம் தொடர்பான விடியோ காட்சிகளும் வெளியாகியுள்ளன. அதில் சாலையின் ஒரு பகுதி சேதமடைந்து கீழே இறங்கியிருப்பதும், சாலையோரத்தில் 3 லாரிகள் கவிழ்ந்து கிடப்பதும் பதிவாகியுள்ளது.

சாலை உள்வாங்கிய பகுதி புதிதாக அமைக்கப்பட்டதாகவும், அங்கு கட்டுமானப் பணிகள் தொடர்ந்து நடைபெற்று வந்ததாகவும் அதிகாரிகள் தெரிவித்துள்ளனர். கனமழைக்கு மத்தியில் சாலை திடீரென உள்வாங்கியதால், அந்த வழியாக வாகனங்கள் செல்வதில் பாதிப்பு ஏற்பட்டுள்ளது. சாலை சேதமடைந்ததற்கான உண்மையான காரணம் குறித்து அதிகாரப்பூர்வ தகவல் இதுவரை வெளியாகவில்லை. இருப்பினும், புதிதாக அமைக்கப்பட்ட சாலையின் தரம் மற்றும் மழையின் தாக்கம் குறித்து கேள்விகள் எழுந்துள்ளன.

சம்பவம் குறித்து தகவல் கிடைத்ததும் அதிகாரிகள் சம்பவ இடத்துக்குச் சென்று நிலைமையை ஆய்வு செய்தனர். சேதமடைந்த சாலையை பாதுகாப்பான முறையில் சீரமைத்து, போக்குவரத்தை மீண்டும் இயல்பு நிலைக்கு கொண்டுவருவதற்கான நடவடிக்கைகள் மேற்கொள்ளப்பட்டு வருகின்றன. கனமழை தொடர்ந்து பெய்து வரும் நிலையில், சாலையின் பாதுகாப்பு குறித்து அதிகாரிகள் கண்காணித்து வருகின்றனர். தேசிய நெடுஞ்சாலையின் புதிய பகுதி திடீரென உள்வாங்கி 3 லாரிகள் பள்ளத்தில் கவிழ்ந்த சம்பவம் அப்பகுதியில் அதிர்ச்சியை ஏற்படுத்தியுள்ளது.