ஆடி அமாவாசை என்பது நம் முன்னோர்களை நினைத்து வழிபடுவதற்கு மிகவும் சக்திவாய்ந்த மற்றும் புனிதமான நாளாகக் கருதப்படுகிறது. ஆண்டுதோறும் வரும் அமாவாசைகளில் தை, ஆடி மற்றும் புரட்டாசி மாதங்களில் வரும் அமாவாசைகள் மிக முக்கியமானவை. இந்த நாட்களில் பித்ருலோகத்தில் இருக்கும் நமது முன்னோர்கள் பூமிக்கு வந்து, நமது வழிபாடுகளை ஏற்று ஆசி வழங்குவதாக ஐதீகம். 2026-ஆம் ஆண்டு ஆடி அமாவாசை ஆகஸ்ட் 12-ஆம் தேதி புதன்கிழமை வருகிறது.

ஆடி அமாவாசை அன்று காலையிலேயே எழுந்து நீராடி, முன்னோர்களை நினைத்து விரதம் இருக்க வேண்டும். இந்த நாளில் தந்தை இல்லாதவர்கள் அவசியம் தர்ப்பணம் கொடுக்க வேண்டும். முன்னோர்களை மதித்து அவர்களுக்குத் தர்ப்பணம் அளித்து படையலிடுவது, அவர்களின் ஆத்மாவை சாந்தியடையச் செய்வதோடு நமது வாழ்க்கையில் நேர்மறையான மாற்றங்களையும், பித்ருக்களின் பரிபூரண ஆசியையும் கொண்டு வரும்.

ஆகஸ்ட் 12 அன்று அதிகாலை 2.11 மணிக்குத் தொடங்கும் அமாவாசை திதி, ஆகஸ்ட் 13 அதிகாலை 12.16 மணி வரை உள்ளது. எனவே, ஆகஸ்ட் 12-ஆம் தேதி காலை 6.00 மணி முதல் பகல் 12.00 மணி வரையிலான நேரத்தை முன்னோர்களுக்குத் தர்ப்பணம் செய்யப் பயன்படுத்திக் கொள்ளலாம்.

தர்ப்பணம் கொடுத்த பிறகு, பகல் பொழுதில் முன்னோர்களுக்கு விருப்பமான சைவ உணவுகளை இலை போட்டுப் படையலிட வேண்டும். காலை 11.00 மணி முதல் 12.00 மணி வரையிலும், அல்லது மதியம் 1.30 மணி முதல் 2.00 மணி வரையிலும் படையலிட்டு வழிபட நல்ல நேரமாகும். படையலிட்ட பிறகு, முதலில் காகத்திற்கு உணவளித்த பிறகே குடும்பத்தினர் உணவருந்த வேண்டும்.

மாலை வேளையில் அருகில் உள்ள கோவிலுக்குச் சென்று நல்லெண்ணெய் தீபமேற்றி வழிபடுவது மிகவும் விசேஷமானது. இந்த எளிய வழிமுறைகளைப் பின்பற்றி ஆடி அமாவாசை நாளில் முன்னோர்களின் ஆசியைப் பெற்று நல்வாழ்வு வாழலாம்.