இந்தியாவில் திருமணமான தம்பதிகளுக்குள் மனைவியின் விருப்பத்திற்கு மாறாக கணவன் இயற்கைக்கு மாறான முறையில் உடலுறவு கொள்வது குற்றமா, இல்லையா என்ற சட்ட விவாதமும், இது தொடர்பான நீதிமன்றங்களின் முரண்பட்ட தீர்ப்புகளும் நீண்ட நாட்களாக நீடித்து வருகின்றன. இந்த நிலையில், இது தொடர்பான முக்கியமான சட்ட விவகாரங்களை விசாரிப்பதற்கு உச்ச நீதிமன்றம் ஒப்புக்கொண்டுள்ளது. நாட்டின் மூன்று வெவ்வேறு உயர் நீதிமன்றங்கள் கடந்த சில மாதங்களில் வழங்கிய நான்கு முக்கியத் தீர்ப்புகள் இந்த விவகாரத்தில் பெரும் சட்டக் குழப்பத்தை ஏற்படுத்தியதைத் தொடர்ந்து, இந்த வழக்கு வரும் செப்டம்பர் 9 அன்று உச்ச நீதிமன்றத்தில் விசாரணைக்கு வரவுள்ளது.

முன்னதாக, இந்திய தண்டனைச் சட்டம்பிரிவு 375-ன் கீழ் கற்பழிப்புக்கான வரையறையில், ‘குறிப்பிட்ட வயதுக்கு மேற்பட்ட மனைவியுடன் கணவன் கொள்ளும் உடலுறவு கற்பழிப்பாகக் கருதப்படாது’ என்ற விதிவிலக்கு அளிக்கப்பட்டிருந்தது. அதேபோல், இயற்கைக்கு மாறான உடலுறவு தொடர்பான வழக்குகளுக்குப் பிரிவு 377 பயன்படுத்தப்பட்டது. 2018-ல் உச்ச நீதிமன்றம் பரஸ்பர சம்மதத்துடன் கூடிய ஓரினச்சேர்க்கையைக் குற்றமற்றதாக்கிய போதிலும், சம்மதமில்லாத இயற்கைக்கு மாறான உறவுகளுக்குப் பிரிவு 377 தொடர்ந்து நீடித்தது. தற்போது ஐபிசி-க்கு மாற்றாகக் கொண்டுவரப்பட்டுள்ள பாரதிய நியாய சம்ஹிதா சட்டத்தில் பிரிவு 377 முழுமையாக நீக்கப்பட்டுள்ளது. இதனால், மனைவியின் சம்மதமின்றி கணவன் இயற்கைக்கு மாறான உறவில் ஈடுபட்டால், அது பிஎன்எஸ் பிரிவுகள் 85 மற்றும் 86 ஆகியவற்றின் கீழ் வருகிறது. இருப்பினும், வயது வந்த மனைவியின் சம்மதமின்றி உடலுறவு கொள்வதற்கு பிஎன்எஸ் பிரிவு 63இன்னும் கணவனுக்கு விலக்கு அளித்துள்ளது.

சட்டங்களின் இந்த நுணுக்கங்களால், பல்வேறு மாநில உயர் நீதிமன்றங்கள் முரண்பட்ட தீர்ப்புகளை வழங்கியுள்ளன. மத்தியப் பிரதேசம் மற்றும் சத்தீஸ்கர் உயர் நீதிமன்றங்கள், திருமண பந்தத்திற்குள் நடக்கும் இத்தகைய செயல்களுக்கு ஐபிசி 375-ல் உள்ள விதிவிலக்கைக் காட்டி, கணவன் மீது பிரிவு 377-ன் கீழ் வழக்குப் பதிவு செய்ய முடியாது என்று தீர்ப்பளித்துள்ளன. ஆனால், இதற்கு முற்றிலும் மாறாக அலகாபாத் உயர் நீதிமன்றம், திருமணத்திற்குள் சம்மதமின்றி நடக்கும் இயற்கைக்கு மாறான உறவுகளுக்குச் சட்டப் பாதுகாப்பு அளிப்பது தவறு என்றும், அவர்கள் மீது குற்றவியல் பிரிவுகளின் கீழ் நடவடிக்கை எடுக்க வேண்டும் என்றும் கூறியுள்ளது. இதற்கிடையே, பஞ்சாப் மற்றும் ஹரியானா உயர் நீதிமன்றம், மனைவியின் விருப்பத்திற்கு மாறாக கணவன் கொள்ளும் இயற்கைக்கு மாறான உறவை ஐபிசி பிரிவு 498A-ன் கீழ் வரும் “குடும்ப வன்கொடுமை மற்றும் மனரீதியான-உடல்ரீதியான சித்திரவதை” என்று கருதலாம் எனத் தீர்ப்பளித்துள்ளது.

இவ்வாறு வெவ்வேறு நீதிமன்றங்கள் வழங்கிய முரண்பட்ட தீர்ப்புகள் நாடு தழுவிய அளவில் காவல்துறையின் விசாரணை மற்றும் கீழ் நீதிமன்றங்களின் செயல்பாடுகளில் பெரும் குழப்பத்தை ஏற்படுத்தியுள்ளன. இதனால், இந்த விவகாரத்தில் உச்ச நீதிமன்றத்தின் தலையீடு மிக அவசியமான ஒன்றாக மாறியுள்ளது. பெண்களின் உடல் சுயாட்சி, கண்ணியம் மற்றும் திருமண உரிமைகள் சார்ந்த சட்டங்களுக்குப் புதிய விளக்கத்தைத் தரப்போகும் இந்த வரலாற்றுச் சிறப்புமிக்க வழக்கின் தீர்ப்பு, நாடு முழுவதும் உள்ள பெண்களின் உரிமைகளைப் பாதுகாப்பதில் மிகப்பெரிய மைல்கல்லாக அமையும் என்று எதிர்பார்க்கப்படுகிறது.