திமுக முன்னாள் அமைச்சர் எ.வ.வேலுவுக்கு எதிராகத் தொடரப்பட்ட மேல்முறையீட்டு வழக்கை உச்ச நீதிமன்றம் தள்ளுபடி செய்து உத்தரவிட்டுள்ளது. முன்னதாக, சொத்துக்குவிப்பு வழக்கு தொடர்பாக முன்னாள் அமைச்சர் எ.வ.வேலுவின் இல்லம் மற்றும் அவருக்குத் தொடர்புடைய இடங்களில் லஞ்ச ஒழிப்புத்துறையினர் அதிரடி சோதனை நடத்தினர்.

இச்சோதனை நடைபெற்ற சமயத்தில், எ.வ.வேலு மருத்துவப் பரிசோதனைக்காகச் சிங்கப்பூரில் அனுமதிக்கப்பட்டிருந்தார். மேலும், அது தொடர்பான மருத்துவ அறிக்கைகளும் முறைப்படி அனுப்பி வைக்கப்பட்டிருந்தன.

இதனிடையே, லஞ்ச ஒழிப்புத்துறை விசாரணைக்கு நேரில் ஆஜராகக் கூடுதல் கால அவகாசம் கேட்டு எ.வ.வேலு தரப்பில் கோரிக்கை விடுக்கப்பட்டிருந்தது. ஆனால், அவர் வெளிநாடு சென்றிருந்ததைக் குறிப்பிட்டு, அவருக்கு எதிராக லஞ்ச ஒழிப்புத்துறையின் சார்பில் ‘லுக் அவுட்’ நோட்டீஸ் பிறப்பிக்கப்பட்டது. இதனை எதிர்த்து சென்னை உயர் நீதிமன்றத்தில் தொடரப்பட்ட வழக்கில், எ.வ.வேலுவுக்கு எதிராகப் பிறப்பிக்கப்பட்ட லுக் அவுட் நோட்டீஸிற்கு உயர் நீதிமன்றம் இடைக்காலத் தடை விதித்து உத்தரவிட்டது.

உயர் நீதிமன்றத்தின் இந்தத் தடை உத்தரவுக்கு எதிராகத் தமிழ்நாடு அரசு தரப்பில் உச்ச நீதிமன்றத்தில் மேல்முறையீடு செய்யப்பட்டது. இந்த வழக்கு இன்று விசாரணைக்கு வந்தபோது, எ.வ.வேலு ஏற்கனவே சிங்கப்பூரில் இருந்து சென்னைக்குத் திரும்பிவிட்டதை நீதிமன்றம் சுட்டிக்காட்டியது. “அவர்தான் தற்பொழுது தமிழகம் திரும்பிவிட்டாரே, இனி நீங்கள் அவரிடம் நேரடியாக விசாரணை நடத்தலாமே?” என்று கேள்வி எழுப்பிய உச்ச நீதிமன்றம், தமிழ்நாடு அரசின் மேல்முறையீட்டு மனுவைத் தள்ளுபடி செய்து அதிரடி தீர்ப்பளித்தது.