மத்தியப் பிரதேச மாநிலம் உஜ்ஜைனியில் ஒட்டுமொத்த சோசியல் மீடியாவையும் நெகிழ வைத்த ஒரு உருக்கமான சம்பவம் நடந்துள்ளது. புற்றுநோய் பாதிப்பால் தங்களது இளம் மகனைப் பறிகொடுத்த ஒரு குடும்பத்தினர், தங்கள் மருமகளை அநாதையாக விட்டுவிடக் கூடாது என்பதில் உறுதியாக இருந்துள்ளனர். கணவனை இழந்து தவித்த மருமகளின் எதிர்காலத்தை நினைத்து வருந்திய அந்த மாமனார் குடும்பம், அவளுக்கு மறுமணம் செய்து வைக்கத் துணிச்சலான ஒரு முடிவை எடுத்தது. அவளது வாழ்க்கையில் புது அத்தியாயத்தைத் தொடங்கி வைக்க முழு ஆதரவு தந்ததோடு மட்டுமல்லாமல், தங்களின் சொந்த மகளாகவே பாவித்து அவளுக்கு ‘கன்னியாதானம்’ செய்து, தாரை வார்த்துக் கொடுத்துள்ளனர்.
வழக்கமான சடங்குகள், சம்பிரதாயங்கள் மற்றும் பழமைவாத எண்ணங்களைத் தூக்கி எறிந்துவிட்டு, மருமகளுக்கு மறுவாழ்வு கொடுத்த இந்த மாமனாரின் நெகிழ்ச்சியான செயல் இணையத்தில் காட்டுத்தீயாகப் பரவி வருகிறது. “இவர்கள் அல்லவா உண்மையான மனிதர்கள்!” என்று நெட்டிசன்கள் பலரும் இந்தக் குடும்பத்தினரின் எல்லையற்ற அன்பு, கண்ணியம் மற்றும் நிபந்தனையற்ற ஆதரவைப் பாராட்டி, வாழ்த்துகளை அள்ளிக்குவித்து வருகின்றனர். இந்த நெகிழ்ச்சியான சம்பவம், சமூகத்தில் பெண்களின் மறுவாழ்வுக்கான ஒரு மிகச்சிறந்த முன்னுதாரணமாக மாறியுள்ளது என்பதில் சந்தேகமே இல்லை!
