உத்தரப்பிரதேச மாநிலம் ஆக்ராவிற்கு சுற்றுலா வந்த பிரான்ஸ் நாட்டைச் சேர்ந்த இரு பெண் சுற்றுலாப் பயணிகளுக்கு, மொழித் தடை காரணமாகப் பெரும் பண இழப்பு ஏற்படும் சூழல் உருவானது. ஆக்ராவில் அவர்கள் பயணித்த டாக்ஸி ஓட்டுநர், பயணத்தின் முடிவில் கூடுதல் கட்டணமாக 500 ரூபாய் கேட்டுள்ளார்.

ஆனால், மொழி புரியாததால் ஏற்பட்ட குழப்பத்தில் அந்தப் பெண் சுற்றுலாப் பயணிகள் 500 ரூபாய்க்குப் பதிலாக 50 யூரோக்களை அவரிடம் கொடுத்துள்ளனர். இந்திய மதிப்பை விட யூரோவின் மதிப்பு மிக அதிகம் என்பதால், அந்த ஓட்டுநரும் அதனைப் பெற்றுக்கொண்டு அங்கிருந்து கிளம்பிவிட்டார்.

“>

இதன் பிறகு, அவர்கள் கொடுத்தது அதிக மதிப்புள்ள வெளிநாட்டுப் பணம் என்பதை உள்ளூர் சுற்றுலா வழிகாட்டி ஒருவர் அவர்களுக்குச் சுட்டிக்காட்டியுள்ளார். இதனால் அதிர்ச்சியடைந்த அந்தப் பெண்கள் உடனடியாக தாஜ் பாதுகாப்புப் போலீஸார் மற்றும் சுற்றுலா காவல் நிலையத்தில் இதுகுறித்து புகார் அளித்தனர்.

மேலும் புகாரைப் பெற்ற ஆக்ரா போலீஸார் உடனடியாக விரைந்து செயல்பட்டு, சம்பந்தப்பட்ட டாக்ஸி ஓட்டுநரைக் கண்டுபிடித்து அவரிடமிருந்த 50 யூரோக்களைப் பறிமுதல் செய்து பிரெஞ்சு சுற்றுலாப் பயணிகளிடம் பாதுகாப்பாக ஒப்படைத்தனர்.

மேலும், அந்த ஓட்டுநரைக் கைது செய்து அவர் மீது சட்டப்பூர்வ நடவடிக்கைகளையும் காவல்துறை தொடங்கியுள்ளது. போலீஸார் தங்களுக்குச் செய்த இந்த விரைவான உதவிக்காக அந்தப் பெண்கள் வீடியோ ஒன்றின் மூலம் தங்களது நெஞ்சார்ந்த நன்றியைத் தெரிவித்துக் கொண்டனர்.

இருப்பினும், இந்தச் சம்பவத்தால் ஏற்பட்ட மன உளைச்சல் காரணமாக, போலீஸார் தாஜ்மஹாலைச் சுற்றிப் பார்க்க ஏற்பாடு செய்வதாகக் கூறியும் அவர்கள் அதனை மறுத்துவிட்டனர். டெல்லியிலிருந்து தங்களுக்குத் திரும்பும் விமானம் இருந்ததால், உலகப் புகழ்பெற்ற தாஜ்மஹாலைக்கூடப் பார்க்காமலேயே மற்றொரு டாக்ஸியை முன்பதிவு செய்து அவர்கள் ஆக்ராவிலிருந்து ஏமாற்றத்துடன் புறப்பட்டுச் சென்றனர்.