பிரபல இந்தியத் திரைப்பட நடிகர் ஆர். மாதவனுக்கு கலைத்துறையில் ஆற்றிய சிறந்த பங்களிப்பிற்காக இந்திய அரசின் உயரிய குடிமை விருதுகளில் ஒன்றான ‘பத்மஸ்ரீ’ விருது வழங்கி கௌரவிக்கப்பட்டது.

இது குறித்து குடியரசுத் தலைவர் மாளிகையில் நடைபெற்ற இந்த வரலாற்றுச் சிறப்புமிக்க விழாவில், குடியரசுத் தலைவர் திரௌபதி முர்முவிடமிருந்து மாதவன் இந்த விருதைப் பெற்றார். விழாவிற்குத் தனது மனைவி சரிதா மற்றும் மகன் வேதாந்துடன் வந்திருந்த மாதவன், நேர்த்தியான நேவி புளூ வண்ண பந்த்கலா பாரம்பரிய உடையில் கம்பீரமாகக் காட்சியளித்தார்.

“>

இருப்பினும், இந்த விழாவில் ஒட்டுமொத்தப் பார்வையாளர்களையும், சமூக வலைத்தளவாசிகளையும் பெரிதும் ஈர்த்தது அவரது ஆடம்பரமான மற்றும் மிகவும் அரிய வகை ‘ஜல்சா’ கைக்கடிகாரம் ஆகும். அவரது மணிக்கட்டை அலங்கரித்த அந்தக் கடிகாரம், பிரபல இந்திய நிறுவனமான டைட்டனின் லக்ஷரி கலெக்ஷனான ‘டைட்டன் நெபுலா ஜல்சா ஃபிளையிங் டூர்பிலான்’ என்ற மாடல் ஆகும். இதன் மதிப்பு சுமார் 40.5 லட்சம் ரூபாய் என்பது பலரையும் வியப்பில் ஆழ்த்தியுள்ளது.

இந்த விலையை விட ஆச்சரியமான விஷயம் என்னவென்றால், உலகிலேயே வெறும் 10 கடிகாரங்கள் மட்டுமே இந்த லிமிடெட் எடிஷனில் தயாரிக்கப்பட்டுள்ளன. 18 கேரட் ரோஸ் கோல்டு கொண்டு வடிவமைக்கப்பட்ட இக்கடிகாரத்தின் டயலில் ஜெய்ப்பூரின் புகழ்பெற்ற வரலாற்றுச் சின்னமான ‘ஹவா மஹால்’ மற்றும் அரச ஊர்வலத்தின் காட்சி நுணுக்கமாக வரையப்பட்டுள்ளது.

இதனைப் பத்மஸ்ரீ விருது பெற்ற புகழ்பெற்ற நுண்கலை ஓவியர் எஸ். ஷாகீர் அலி தன் கைகளால் வரைந்துள்ளார் என்பது குறிப்பிடத்தக்கது. இதன் மூலம் பத்மஸ்ரீ விருது பெறும் ஒரு நடிகர், மற்றொரு பத்மஸ்ரீ வெற்றியாளரின் கைவண்ணத்தில் உருவான அரிய கலைப்படைப்பை அணிந்திருந்த ஒரு உன்னதமான தருணமாக இது அமைந்தது.