உலகில் எத்தனையோ உறவுகள் இருந்தாலும், கொண்டாடத் தவறிய ஒரு உன்னத உறவு உண்டென்றால் அது அப்பாதான். அம்மா காட்டும் பாசம் உடனடியாக வெளியில் தெரிந்துவிடும்; ஆனால் அப்பாக்கள் காட்டும் பாசம், அவர்கள் சிந்தும் வியர்வையிலும் மௌனத்திலும்தான் ஒளிந்திருக்கிறது.
நேரில் பார்த்தால் பேசத் தயங்கும், ‘ஐ லவ் யூ’ சொல்ல பயப்படும் பிள்ளைகளின் சார்பாக, இந்தத் தந்தையர் தினத்தில் அப்பாக்களுக்காக ஒரு கடிதம் இதோ!
அன்புள்ள அப்பா,
வாழ்க்கையில் பல விஷயங்களைப் பற்றி சமூக ஊடகங்களிலும், நண்பர்களிடமும் மணிக்கணக்காகப் பேசுகிறோம். ஆனால், நம்மைப் பெற்றெடுத்து, நமக்காகவே வாழும் உங்களிடம் நேருக்கு நேர் நின்று இரண்டு நிமிடங்கள் கூட நம்மால் பேச முடிவதில்லை. ஒருவித பயம், மரியாதை அல்லது தயக்கம் நம்மைத் தடுத்துவிடுகிறது. அதனால்தான், நெஞ்சில் இருக்கும் உண்மைகளை இந்த ஓபன் லெட்டர் மூலமாக உங்களிடம் கொட்டுகிறோம்.
வெளியே ஹிட்லர்… உள்ளே பாசக்காரர்!
சின்ன வயதில் நீங்கள் வீட்டிற்குள் நுழையும் போது, ‘அப்பா வந்துட்டாங்க!’ என்று வீடே அமைதியாகிவிடும். நீங்கள் போடும் சத்தமும், காட்டும் கண்டிப்பும் அன்று எங்களை அச்சுறுத்தியது உண்மைதான். உங்களை ஒரு ‘ஹிட்லர்’ போலத்தான் நாங்கள் பார்த்தோம். ஆனால், இன்று வெளி உலகத்திற்குள் நாங்கள் காலடி எடுத்து வைக்கும் போதுதான் தெரிகிறது, அன்று நீங்கள் காட்டிய கண்டிப்புதான் இன்று எங்களை எத்தனையோ ஏமாற்றங்களில் இருந்தும், தவறான பாதைகளில் இருந்தும் காப்பாற்றிக் கொண்டு நிற்கிறது என்று!
எந்தப்பல்கலைக்கழகமும் சொல்லித் தராத பாடம்!
நாங்கள் ஆசைப்படும் உடைகள், மொபைல் போன்கள், கல்வி என எல்லாவற்றையும் நீங்கள் கடன்பட்டாவது வாங்கிக் கொடுத்து விடுகிறீர்கள். ஆனால், உங்களுடைய கிழிந்த செருப்பையும், தேய்ந்து போன சட்டையையும் நீங்கள் என்றுமே மாற்றிக் கொள்ள நினைத்ததே இல்லை. எந்தப் பொருளாதாரப் பேராசிரியரும் சொல்லித் தராத ‘பட்ஜெட்’ ரகசியங்களை உங்கள் வாழ்க்கை மூலமாக எங்களுக்குக் கற்றுக் கொடுத்துள்ளீர்கள்.
வார்த்தைகள் இல்லாத மௌனப் பாசம்!
அம்மாக்கள் பாசத்தை வார்த்தைகளால் கொட்டி விடுவார்கள். ஆனால் நீங்கள், நாங்கள் தூங்கும் போது வந்து தலையைக் கோதுவதிலும், தேர்வு முடிவுகள் வரும் போது வெளியில் காட்டிக் கொள்ளாமல் தவிப்பதிலும்தான் உங்கள் பாசத்தைக் காட்டுவீர்கள். தோல்விகள் எங்களை முடக்கும் போதெல்லாம், “நான் இருக்கிறேன், பார்த்துக்கொள்ளலாம்” என்று நீங்கள் சொல்லும் அந்த ஒற்றை வார்த்தை, எந்த ஒரு மோட்டிவேஷனல் ஸ்பீச்சையும் விட எங்களுக்குப் பெரிய பலத்தைத் தருகிறது.
எங்கள் நிஜமான சூப்பர் ஹீரோ!
திரையில் வரும் சூப்பர் ஹீரோக்களைக் கொண்டாடும் உலகம், நிஜ வாழ்க்கையில் எங்களைச் சுமக்கும் உங்களைக் கொண்டாட மறந்துவிடுகிறது. உங்கள் தோள்களில் அமர்ந்து நாங்கள் பார்த்த உலகத்தை விட, இன்று உங்கள் உழைப்பால் நாங்கள் பார்க்கும் உலகம் மிக உன்னதமானது.
அப்பா, உங்களிடம் நேரில் சொல்ல முடியாத நன்றிகளையும், கோடி முத்தங்களையும் இந்த ஓபன் லெட்டர் மூலமாகச் சமர்ப்பிக்கிறோம். நீங்கள் எங்களின் பெருமை, எங்களின் அடையாளம், எப்போதும் எங்களின் ஒரே சூப்பர் ஹீரோ நீங்கள்தான்! இனிய தந்தையர் தின நல்வாழ்த்துகள் அப்பா!
அப்பாக்களின் அன்பு என்பது கடலின் ஆழத்தைப் போன்றது, அது வெளியில் அமைதியாகத் தெரிந்தாலும் உள்ளே பிரம்மாண்டமானது. வருடத்தின் 365 நாட்களும் நமக்காக ஓயாமல் உழைக்கும் அந்த உன்னத மனிதரை, இந்த ஒரு நாளில் மட்டும் கொண்டாடிவிட்டு கடந்து போய்விட முடியாது. இந்தத் தந்தையர் தினத்தில், உங்கள் அப்பாவின் கைகளைப் பிடித்து, “நீங்கள் தான் என் சூப்பர் ஹீரோ அப்பா” என்று ஒரு வார்த்தை சொல்லுங்கள். அது நீங்கள் அவருக்குத் தரும் ஆகச்சிறந்த பரிசாக இருக்கும்
