சொகுசு ஹோட்டல் அறைகளில் ஏன் கடிகாரங்கள் இருப்பதில்லை என்பதற்குப் பின்னால் சுவாரசியமான உளவியல் மற்றும் வணிக உத்திகள் உள்ளன. பொதுவாக மக்கள் தங்களது பரபரப்பான வாழ்க்கையிலிருந்து விடுபட்டு, மன அழுத்தமின்றி ஓய்வெடுக்கவே ஹோட்டல்களுக்கு வருகின்றனர்.
அறையில் கடிகாரம் இருந்தால், விருந்தினர்கள் நேரத்தை அடிக்கடி கவனித்து, அடுத்த வேலை அல்லது அறையை காலி செய்யும் நேரத்தைப் பற்றி கவலைப்படத் தொடங்குவார்கள். இதைத் தவிர்க்கவே ஹோட்டல் உரிமையாளர்கள் ‘நேரமற்ற’ சூழலை உருவாக்குகின்றனர்.
கடிகாரத்தின் டிக்-டிக் சத்தம் இல்லாத அமைதியான சூழல், மென்மையான விளக்குகள் மற்றும் நறுமணம் ஆகியவை விருந்தினர்களை உலகையே மறந்து நிம்மதியாகத் தங்க வைக்கின்றன.
இதற்குப் பின்னால் ஒரு புத்திசாலித்தனமான வணிக உத்தியும் ஒளிந்துள்ளது. மக்கள் நேரத்தைப் பற்றிய கவலையின்றி இருக்கும்போது, ஹோட்டலில் உள்ள உணவகங்கள், ஸ்பா, நீச்சல் குளம் மற்றும் கஃபே போன்ற வசதிகளை அதிக நேரம் பயன்படுத்துவார்கள்.
இது ஹோட்டலின் வருவாயை அதிகரிக்க உதவுகிறது. சில நேரங்களில் நேரத்தை கவனிக்காமல் தாமதமாக அறையை காலி செய்யும் விருந்தினர்கள், கூடுதல் கட்டணம் செலுத்த வேண்டிய நிலையும் ஏற்படுகிறது.
இருப்பினும், வணிக ரீதியான ஹோட்டல்கள் மற்றும் விமான நிலைய ஹோட்டல்களில் பயணிகளின் வசதிக்காக டிஜிட்டல் கடிகாரங்கள் வைக்கப்படுகின்றன. ஆனால், சொகுசு ரிசார்ட்டுகள் எப்போதும் அமைதியையும் நேரமில்லா அனுபவத்தையுமே வழங்க விரும்புகின்றன.
