அமெரிக்க அதிபர் ட்ரம்ப் டென்மார்க்கிற்குச் சொந்தமான கிரீன்லாந்தை இணைக்க முயல்வதும், நேட்டோ அமைப்பிலிருந்து அமெரிக்கா வெளியேறத் துடிப்பதும் உலக அரசியலில் பெரும் புயலைக் கிளப்பியுள்ளது. அமெரிக்காவின் பங்களிப்பு இல்லாமல் நேட்டோ பலவீனமடையும் சூழலில், ஐரோப்பிய நாடுகள் தங்களின் பாதுகாப்பிற்காக அமெரிக்காவைச் சார்ந்து இருப்பதை உடனடியாக நிறுத்த வேண்டும் என உக்ரைன் அதிபர் ஜெலன்ஸ்கி எச்சரித்துள்ளார்.
அமெரிக்கா விலகுவது என்பது ரஷ்ய அதிபர் புதினுக்குத் தரப்படும் பரிசு போன்றது என்றும், இது லிதுவேனியா மற்றும் போலந்து போன்ற நாடுகளுக்குப் பெரும் அச்சுறுத்தலாக முடியும் என்றும் அவர் கவலை தெரிவித்துள்ளார்.இனிவரும் காலங்களில் ஐரோப்பா வெறும் பின்தொடரும் சக்தியாக மட்டும் இல்லாமல், தனக்கென ஒரு பலமான தனி ராணுவத்தை உருவாக்கிக் கொள்ள வேண்டியது அவசியம் என்று ஜெலன்ஸ்கி வலியுறுத்தியுள்ளார்.
அமெரிக்காவின் நிலைப்பாடுகள் அடிக்கடி மாறி வருவதால், ஐரோப்பா தனது சொந்தப் பாதுகாப்பைத் தானே உறுதி செய்யத் தயாராக இருக்க வேண்டும் என்பதே அவரது வாதம். உக்ரைனின் இந்த அதிரடி கருத்து, உலக நாடுகளிடையே நேட்டோவின் எதிர்காலம் குறித்த புதிய விவாதத்தைத் தொடங்கி வைத்துள்ளது.
