மதிமுக பொதுச்செயலாளர் வைகோவை விமர்சித்து நாஞ்சில் சம்பத் அண்மையில் வெளியிட்ட கருத்துக்கள் தமிழக அரசியல் களத்தில் பெரும் பரபரப்பை ஏற்படுத்தியுள்ளன. சென்னை அம்பத்தூர் தொழிற்பேட்டை பகுதியில் நடைபெற்ற தமிழக வெற்றிக் கழகத்தின் பொதுக்கூட்டத்தில் பேசிய அவர், அண்ணா மற்றும் வைகோவைப் பார்த்து தான் தான் அரசியலுக்கு வந்ததாகக் குறிப்பிட்டார்.

ஆனால், இன்று வைகோ தனது மதிமுக கட்சியை அண்ணா அறிவாலயத்திலேயே (திமுக தலைமையகம்) அடக்கம் செய்துவிட்டு அமர்ந்திருப்பதாகக் கடுமையாகச் சாடினார். வைகோவின் தற்போதைய அரசியல் நகர்வுகள் அவரது தனித்துவத்தைத் தொலைத்துவிட்டதாக நாஞ்சில் சம்பத் தனது உரையில் சுட்டிக்காட்டினார்.

இதை தொடர்ந்து பேசிய அவர், தமிழக வெற்றிக் கழகத் தலைவர் விஜய்யின் அரசியல் வருகை மற்றும் வளர்ச்சியைப் பார்த்து அண்ணா அறிவாலயத்தின் கால்கள் ஆடுவதாகத் தெரிவித்தார். திமுக மற்றும் அதிமுக ஆகிய இரு பெரும் கட்சிகளும் பல கட்சிகளுடன் கூட்டணி அமைத்துச் செயல்படும் வேளையில், விஜய் ஒருவராக 36 கட்சிகளை எதிர்த்து நிற்பதாக அவர் பெருமிதத்துடன் கூறினார்.