பெற்றோர்கள் திட்டியதால் கோபமடைந்த 13 வயது சிறுமி, தனது தம்பி மற்றும் ஆதார் கார்டுடன் வீட்டை விட்டு வெளியேறிய சம்பவம் பெங்களூருவில் பெரும் பரபரப்பை ஏற்படுத்தியுள்ளது. படிப்பில் ஆர்வம் காட்டவில்லை என்பதற்காகத் தாய் கண்டித்ததால் மனமுடைந்த அந்தச் சிறுமி, தனது 8 வயது தம்பியை அழைத்துக் கொண்டு யாரிடமும் சொல்லாமல் வீட்டை விட்டுச் சென்றுள்ளார்.

இந்த அதிர்ச்சியூட்டும் தகவலை அறிந்த பெற்றோர் உடனடியாகப் புகாரளிக்க, காவல்துறையினர் தீவிர தேடுதல் வேட்டையில் இறங்கினர். சிறுமி தனது அடையாளத்தை நிரூபிக்க ஆதார் கார்டையும் கையில் எடுத்துச் சென்றது போலீசாரின் விசாரணையில் தெரியவந்தது.

மேலும் பெங்களூரு ரயில் நிலையத்தில் இவர்கள் இருவரையும் கண்டறிந்த ரயில்வே பாதுகாப்புப் படையினர், அவர்களைப் பத்திரமாக மீட்டனர். பின்னர் உரிய விசாரணைக்குப் பிறகு, குழந்தைகள் இருவரும் அவர்களது பெற்றோரிடம் ஒப்படைக்கப்பட்டனர்.

இந்நிலையில் சிறு வயதில் எடுக்கும் இத்தகைய உணர்ச்சிவசப்பட்ட முடிவுகள் விபரீதத்தில் முடியக்கூடும் என்பதால், குழந்தைகளிடம் நிதானமாகவும் அன்பாகவும் நடந்து கொள்ள வேண்டும் என்று சமூக ஆர்வலர்கள் அறிவுறுத்தி வருகின்றனர்.