அதிமுக முன்னாள் அமைச்சர் ராஜேந்திர பாலாஜி பேசியுள்ள கருத்துக்கள் தற்போது அரசியல் வட்டாரத்தில் பெரும் விவாதத்தைக் கிளப்பியுள்ளது. “திமுகவைப் போலவே அதிமுகவும் தனது ஆட்சியில் எந்தக் கட்சிக்கும் பங்கு கொடுக்காது” என்று அவர் திட்டவட்டமாகக் கூறியுள்ளார். மேலும், சிறிய கட்சிகள் தங்களைப் பெரிய பலமான சக்தியாகக் கருதிக் கொள்ளக் கூடாது என்றும், கூட்டணியைப் பலப்படுத்தவே அவர்களை இணைக்கிறோமே தவிர, அதிமுக பலவீனமான கட்சி என்பதால் அல்ல என்றும் அவர் அதிரடியாகத் தெரிவித்துள்ளார்.
ராஜேந்திர பாலாஜியின் இந்த வெளிப்படையான பேச்சு அதிமுக கூட்டணியில் உள்ள மற்ற கட்சிகளிடையே பெரும் சலசலப்பை ஏற்படுத்தியுள்ளது. தேர்தல் நெருங்கும் வேளையில், “ஆட்சியில் பங்கு இல்லை” என்ற இவருடைய அறிவிப்பு கூட்டணிப் பேச்சுவார்த்தைகளில் சிக்கலை உருவாக்குமோ என்ற அச்சம் எழுந்துள்ளது. சிறிய கட்சிகளைச் சற்றுக் குறைத்து மதிப்பிடும் வகையில் அவர் பேசியிருப்பது, மற்ற தலைவர்களிடையே அதிருப்தியை ஏற்படுத்தியுள்ளதால், அதிமுகவின் அடுத்தகட்ட நகர்வு என்னவாக இருக்கும் என்ற எதிர்பார்ப்பு எகிறியுள்ளது.
