தமிழகம் உட்பட நாடு முழுவதும் தெருநாய்க்கடி பாதிப்புகள் அதிகரித்து வரும் நிலையில், இது தொடர்பான வழக்கை விசாரித்த உச்சநீதிமன்றம் மாநில அரசுகளுக்குக் கடுமையான எச்சரிக்கையை விடுத்துள்ளது. கடந்த ஐந்து ஆண்டுகளாக இந்த விவகாரத்தில் முறையான தடுப்பு நடவடிக்கைகளை எடுக்காததே பாதிப்புகள் அதிகரிக்கக் காரணம் என்று நீதிபதிகள் சுட்டிக்காட்டினர். இனிவரும் காலங்களில் தெருநாய்கள் கடித்தால், அதனால் பாதிக்கப்படுபவர்களுக்கு மாநில அரசுகள் அதிகப்படியான இழப்பீட்டுத் தொகையை வழங்க வேண்டியிருக்கும் என்று நீதிமன்றம் அதிரடியாகத் தெரிவித்துள்ளது.
அதேபோல், தெருநாய்களுக்கு உணவளிப்பவர்கள் மற்றும் ஆதரவு தருபவர்களுக்கும் உச்சநீதிமன்றம் சில முக்கிய அறிவுறுத்தல்களை வழங்கியுள்ளது. தெருக்களில் நாய்களுக்கு உணவளிப்பவர்கள், அந்த நாய்களால் ஏற்படும் பாதிப்புகளுக்கும் பொறுப்பேற்க வேண்டும் என்று நீதிபதிகள் தெரிவித்தனர். “தெருநாய்கள் மீது அவ்வளவு அக்கறை இருப்பவர்கள், அவற்றை ஏன் தங்கள் வீடுகளிலேயே வளர்க்கக்கூடாது?” என்ற கேள்வியையும் முன்வைத்தனர். இதன் மூலம் தெருநாய்கள் பிரச்சினையை ஒரு சமூகப் பொறுப்பாக அணுக வேண்டியதன் அவசியத்தை நீதிமன்றம் வலியுறுத்தியுள்ளது.
