கோயம்புத்தூர் அருகே கடந்த மாதம் 28-ஆம் தேதி நிகழ்ந்த பெண் கொலை வழக்கில், அதிமுக நிர்வாகி ஒருவர் கைது செய்யப்பட்டது பெரும் பரபரப்பை ஏற்படுத்தியுள்ளது.

இந்தச் சம்பவத்தில், கவிசரவணக்குமார் என்ற அதிமுக நிர்வாகியின் மனைவி மகேஸ்வரி, கார் ஓட்டுநர் சுரேஷ் என்பவரால் கொலை செய்யப்பட்டார். காவல்துறையினரின் தீவிர விசாரணையில், இந்தக் கொலைக்குப் பின்னால் கவிசரவணக்குமாரின் சதி இருப்பது அம்பலமானது.

விவாகரத்து அளிக்க மறுத்து வந்த தனது மனைவி மகேஸ்வரியைக் கொலை செய்யுமாறு, கார் ஓட்டுநர் சுரேஷுக்கு கவிசரவணக்குமார் சதித் திட்டம் தீட்டிக் கொடுத்துள்ளார். மேலும், இந்தக் கொலைக்காகச் சுரேஷுக்கு செங்கல் சூளை  ஒன்றை எழுதித் தருவதாகவும் அவர் ஆசை வார்த்தை காட்டியுள்ளார்.

இந்த அதிர்ச்சித் தகவல்கள் வெளியானதைத் தொடர்ந்து, மனைவியைக் கொலை செய்யத் தூண்டிய குற்றத்திற்காக அதிமுக நிர்வாகியான கவிசரவணக்குமார் கைது செய்யப்பட்டார். இந்தக் கொடூரச் சம்பவம் அப்பகுதியில் பெரும் அதிர்வலைகளை ஏற்படுத்தியுள்ளது.