திருவனந்தபுரம் கரகுளம் பகுதியைச் சேர்ந்த பாசுரன் ஆசாரி (73), தனது மனைவி ஜெயந்தி (63) சிறுநீரக கோளாறால் கடந்த 9 நாட்களாக தனியார் மருத்துவமனையில் சிகிச்சை பெற்று வந்த நிலையில், தொடர்ந்து உடன் இருந்து கவனித்துள்ளார். மனைவியின் நிலைமை மேலும் மோசமாகி வருவதை  கண்ட, பாசுரன் ஆழ்ந்த மன உளைச்சலில் சிக்கினார்.

இந்த நெஞ்சை நெகிழவைக்கும் சம்பவம் நேற்று அதிகாலை 3 மணியளவில் நடந்தது. திடீரென, ஆஸ்பத்திரியின் 5-வது மாடியில் இருந்து பாசுரன் ஆசாரி கீழே குதித்து தற்கொலை செய்து கொண்டார். அவரை உடனடியாக மீட்டு சிகிச்சை அளித்தும், அவர் பரிதாபமாக உயிரிழந்தார். இதற்கிடையே, ஜெயந்தி பிணமாக கிடந்தது மருத்துவ ஊழியர்களை அதிர்ச்சியில் ஆழ்த்தியது.

ஜெயந்தியின் கழுத்தில் மின்வயரால்  நெரித்து கொலை செய்யப்பட்டுள்ளதற்கான அறிகுறிகள் உறுதி செய்யப்பட்டன. தொடர்ந்து விசாரணையில், அவதிப்படும் மனைவியை கொன்று விட்டு தானும் தற்கொலை செய்திருக்கலாம் என போலீசார் சந்தேகம் வெளியிட்டுள்ளனர்.

மருத்துவக் கல்லூரி போலீசார் இந்த இரட்டை மரணம் தொடர்பாக வழக்குப்பதிவு செய்து விசாரணை நடத்தி வருகின்றனர். இச்சம்பவம் மருத்துவமனை வளாகத்திலும், பகுதி மக்களிடையிலும் பெரும் சோகத்தையும் பரபரப்பையும் ஏற்படுத்தியுள்ளது.